India vs England 1st Test Live : भारताच्या विजयाच्या मार्गात पावसाचा अडथळा, जाणून घ्या कधी सुरू होणार सामना!

india vs England 2021 1st test match live cricket score : गोलंदाजांच्या दमदार कामगिरीच्या जोरावर टीम इंडियानं पहिल्या कसोटीत विजयाच्या दिशेनं पाऊल टाकलं आहे, परंतु पाचव्या दिवशी पाऊस इंग्लंडच्या मदतीला धावून आलेला पाहायला मिळत आहे. भारतीय वेळेनुसार हा सामना दुपारी ३.३० वाजल्यापासून सुरू होणार होता, परंतु सध्या तिथे पाऊस सुरू असल्यानं मॅच सुरू होण्यास विलंब लागत आहे.  पहिल्या डावात १८३ धावांवर इंग्लंडला गुंडाळून भारतानं २७८ धावांसह ९५ धावांची आघाडी घेतली. ही पिछाडी भरून काढण्यात इंग्लंडची दमछाक झाली, परंतु कर्णधार जो रुटनं यशस्वी खिंड लढवताना भारतासमोर तगडे आव्हान उभे केले. जसप्रीत बुमराहनं ६४ धावांत ५ विकेट्स घेतल्या, तर मोहम्मद सिराज व शार्दूल ठाकूर यांनी प्रत्येकी २ बळी टिपले.  रूटनं १७२ चेंडूंत १४ चौकारांसह १०९ धावा केल्या आणि त्याला बुमराहनं बाद केले. बुमराहनं दुसऱ्या डावात पाच विकेट्स घेण्याचा पराक्रम केला. इंग्लंडचा दुसरा डाव ३०३ धावांवर गुंडाळला गेला. भारतासमोर विजयासाठी २०९ धावांचे लक्ष्य आहे. लक्ष्याचा पाठलाग करताना लोकेश राहुलनं सॉलिड खेळ केला, परंतु ३८ चेंडूंत २६ धावा करून त्याला माघारी जावं लागलं. रोहित शर्मा व चेतेश्वर पुजारानं आणखी धक्का बसू दिला नाही. रोहित १२ व पुजारा १२ धावांवर खेळत असून टीम इंडियानं दिवसअखेर १ बाद ५२ धावा केल्या आहेत. नॉटिंग्हॅमवर इतिहास रचण्यासाठी भारताला आणखी १५७ धावांची गरज आहे. पण, पावसामुळे अजूनही सामना सुरू झालेला नाही.