India Wins 1st Test against West Indies: रवींद्र जडेजा आणि मोहम्मद सिराज यांच्या भेदक गोलंदाजीच्या बळावर भारतीय संघाने वेस्ट इंडिजविरुद्धचा पहिला कसोटी सामना तिसऱ्याच दिवशी जिंकला आहे. भारताने वेस्ट इंडिजचा एका डाव आणि १४० धावांनी दारुण पराभव करत दोन सामन्यांच्या मालिकेत १-० अशी आघाडी घेतली.
पहिल्या डावात वेस्ट इंडिजचा फ्लॉप शो
नाणेफेक जिंकून प्रथम फलंदाजी करणाऱ्या वेस्ट इंडिजचा डाव पहिल्या डावात अवघ्या १६२ धावांवर आटोपला. सलामीवीर तेगनारायण चंद्रपॉलला खातेही उघडता आले नाही. त्यांच्याकडून केवळ जस्टिन ग्रीव्हजने (३२) थोडाफार संघर्ष केला, ज्यामुळे संघाला १०० धावांचा टप्पा ओलांडता आला. भारताकडून वेगवान गोलंदाज मोहम्मद सिराजने (४ विकेट्स) भेदक मारा केला, तर जसप्रीत बुमराहने (३ विकेट्स) अचूक यॉर्कर टाकत महत्त्वपूर्ण विकेट्स घेतले. फिरकीपटू कुलदीप यादवने दोन विकेट्स घेत त्यांना चांगली साथ दिली.
भारताच्या तीन फलंदाजांची शतकी खेळी
वेस्ट इंडिजला १६२ धावांवर बाद केल्यानंतर भारतीय फलंदाजांनी मात्र शानदार खेळ केला. सलामीवीर केएल राहुल (१०० धावा), युवा यष्टिरक्षक ध्रुव जुरेल (१२५ धावा) आणि अष्टपैलू रवींद्र जडेजा (१०४ धावा) या तिघांनी शतके झळकावली. याव्यतिरिक्त, कर्णधार शुभमन गिलने ५० धावांचे आणि यशस्वी जयस्वालने ३६ धावांचे महत्त्वाचे योगदान दिले. या खेळाडूंमुळे भारतीय संघाने ५ विकेट्स गमावून ४४८ धावांवर आपला पहिला डाव घोषित केला आणि पहिल्या डावाच्या आधारावर २८६ धावांची मोठी आघाडी घेतली. वेस्ट इंडिजकडून रोस्टन चेसने दोन विकेट्स घेतल्या.
दुसऱ्या डावातही वेस्ट इंडिजची निराशा
पहिल्या डावात खराब कामगिरीनंतर वेस्ट इंडिजचे फलंदाज दुसऱ्या डावातही लय शोधू शकले नाहीत आणि त्यांचा पराभव निश्चित झाला. दुसऱ्या डावात संघाने केवळ ४६ धावांत पाच विकेट्स गमावल्या. अ‍ॅलिक अथानाझे (३८ धावा) आणि जस्टिन ग्रीव्हज (२५ धावा) यांनी काही धावा केल्या. तर, शेवटी जेडेन सील्सने (२२ धावा) फटकेबाजी केली, पण वेस्ट इंडिजचा संपूर्ण संघ केवळ १४६ धावांवर ऑल आऊट झाला.
भारताची मालिकेत १-० अशी आघाडी
भारताकडून दुसऱ्या डावात रवींद्र जडेजाने (४ विकेट्स) वेस्ट इंडिजची मधली फळी उद्ध्वस्त केली. तर मोहम्मद सिराजने (३ विकेट्स) आणि कुलदीप यादवने (२ विकेट्स) त्याला उत्कृष्ट साथ दिली. वॉशिंग्टन सुंदरलाही एक विकेट मिळाली. या विजयासह भारताने दोन सामन्यांच्या कसोटी मालिकेत १-० अशी आघाडी घेतली.
Web Summary : Ravindra Jadeja and Mohammed Siraj's fiery bowling led India to victory against the West Indies in just three days. India dominated, winning by an innings and 140 runs, taking a 1-0 lead in the two-match series.
Web Summary : रवींद्र जडेजा और मोहम्मद सिराज की शानदार गेंदबाजी के दम पर भारत ने वेस्ट इंडीज को तीन दिनों में हराया। भारत ने एक पारी और 140 रनों से जीत दर्ज करते हुए दो मैचों की श्रृंखला में 1-0 की बढ़त बनाई।