कोलकाता : भारताने वेस्ट इंडिजविरुद्ध कसोटीपाठोपाठ वन डे मालिकाही खिशात घातली. रविवारपासून भारत विरुद्ध वेस्ट इंडिज यांच्यात ट्वेंटी-20 मालिकेला सुरूवात होणार आहे. या मालिकेसाठी निवडलेल्या संघात कर्णधार विराट कोहली आणि माजी कर्णधार महेंद्रसिंग धोनी या प्रमुख खेळाडूंना विश्रांती देण्यात आली आहे. रोहित शर्माच्या नेतृत्वाखाली भारतीय संघ ट्वेंटी-20 मालिकाही जिंकण्यासाठी सज्ज झाला आहे. मात्र, क्रिकेटच्या या शॉर्टेस्ट फॉरमॅटकडे कोलाकातातील क्रिकेट चाहत्यांनी पाठ फिरवल्याचे दिसत आहे.
इडन गार्डन स्टेडियमची प्रेक्षकक्षमता 66 हजार आहे. त्यात बंगाल असोसिएशनकडून 15000 तिकीटं मोफत देण्यात येणार आहेत. दोन्ही संघात प्रमुख खेळाडूंची अनुपस्थिती या सामन्यातील अत्यल्प प्रतिसादाला कारणीभूत असल्याचे बोलले जात आहे. त्यात या सामन्याच्ये तिकिटांची किंमत ही 650, 1300 आणि 1900 अशी आहे. त्यामुळेही इतके महाग तिकीट खरेदी करून कोणी येऊ इच्छित नाही. तीन तासांच्या सामन्यासाठी हे महागडे तिकीट आहे, असे एका सदस्याने सांगितले.