IND vs SA: टीम इंडियासोबतच असं का घडतंय? २०२३ च्या वनडे वर्ल्डकपपासून लागलेलं ग्रहण अजूनही सुटेना!

Team India ODI Toss Report: २०२३ च्या एकदिवसीय विश्वचषकानंतर भारतीय संघाने सलग १९ वेळा टॉस गमावला आहे.

दोन सामन्यांच्या कसोटी मालिकेनंतर भारत आणि द.आफ्रिका यांच्यातील तीन सामन्यांच्या एकदिवसीय मालिकेला आजपासून सुरूवात झाली.  मालिकेतील पहिला सामना आज रांची येथील जेएससीए आंतरराष्ट्रीय स्टेडियम कॉम्प्लेक्समध्ये खेळला जात आहे. या सामन्यात भारतीय संघाचा कर्णधार केएल राहुलने टॉस गमावला. यासह भारतीय संघाच्या नावावर नकोशा विक्रमाची नोंद झाली आहे. भारताने सलग १९ व्या एकदिवसीय सामन्यात टॉस गमावला आहे.

२०२३ च्या विश्वचषक अंतिम सामन्यानंतर भारतीय संघाने अद्याप एकाही एकदिवसीय सामन्यात टॉस जिंकलेला नाही. तब्बल १९ वेळा भारताने टॉस गमावला आहे, जो कोणत्याही आंतरराष्ट्रीय संघाने एकदिवसीय सामन्यांमध्ये सलग सर्वाधिक नाणेफेक गमावण्याचा जागतिक विक्रम आहे. या यादीत नेदरलँड्सचा संघ दुसऱ्या क्रमांकावर आहे, ज्यांनी सलग ११ एकदिवसीय सामन्यात टॉस गमावला आहे. टॉस जिंकल्यास कर्णधाराला खेळपट्टी आणि परिस्थितीनुसार फलंदाजी किंवा गोलंदाजी निवडण्याचा महत्त्वपूर्ण फायदा मिळतो. मात्र, सलग १९ सामन्यांत नाणेफेक गमावल्यामुळे भारतीय संघाला प्रत्येक वेळी प्रतिस्पर्धी संघाच्या निर्णयानुसार मैदानात उतरावे लागले.

द.आफ्रिकाविरुद्ध खेळल्या गेलेल्या दोन सामन्यांच्या कसोटी मालिकेत भारताला लाजिरवाण्या पराभवाला सामोरे जावा लागले. भारताने ०-२ अशा फरकाने मालिका गमावली आहे. त्यामुळे चाहत्यांमध्ये नाराजी पसरली असून एकदिवसीय मालिकेत भारतीय संघ चांगली कामगिरी करून दाखवेल, अशी अपेक्षा केली जात आहे. 

भारताची प्लेइंग इलेव्हन:

रोहित शर्मा, यशस्वी जैस्वाल, विराट कोहली, रुतुराज गायकवाड, वॉशिंग्टन सुंदर, केएल राहुल (यष्टीरक्षक/कर्णधार), रवींद्र जडेजा, हर्षित राणा, कुलदीप यादव, अर्शदीप सिंग, प्रसीद कृष्णा.

दक्षिण आफ्रिकेचा प्लेइंग इलेव्हन: 

रायन रिकेल्टन, क्विंटन डी कॉक (यष्टीरक्षक), एडन मार्कराम (कर्णधार), मॅथ्यू ब्रेट्झके, टोनी डी झोर्झी, डेवाल्ड ब्रेविस, मार्को जॅन्सन, कॉर्बिन बॉश, प्रेनेलन सुब्रेन, नांद्रे बर्गर, ओटनील बार्टमन.