Zanai Bhosle on Siraj, IND vs ENG 5th Test Day 5 Live: भारतीय संघाने इंग्लंड विरूद्धच्या पाचव्या आणि शेवटच्या कसोटीत रोमांचक विजय मिळवला. पहिल्या डावात भारताने २२४ तर इंग्लंडने २४७ धावा केल्या होत्या. त्यानंतर भारताने दुसऱ्या डावात ३९६ धावा करत इंग्लंडला ३७४ धावांचे आव्हान दिले. या आव्हानाचा पाठलाग करताना हॅरी ब्रूक आणि जो रूट यांच्या शतकांमुळे इंग्लंडचा विजय दृष्टीपथात होता. पण शेवटच्या दिवशी इंग्लंडला ३५ धावांची गरज असताना, भारतीय गोलंदाजांनी ४ गडी बाद करत संघाला विजय मिळवून दिला. त्यात ४ पैकी ३ बळी घेत मोहम्मद सिराजने सिंहाचा वाटा उचलला. सिराजच्या या विजयश्री खेचून आणणाऱ्या गोलंदाजीचे चहुबाजूंनी कौतुक होत आहे. तशातच लोकप्रिय गायिका आशा भोसले यांची नात जनाई भोसले हिने खास पोस्ट केली.
जनाई भोसले ही उत्तम गायिका आहेच. मात्र जनाईच्या गाण्यापेक्षा तिच्या ग्लॅमरस लूकमुळे ती अधिक वेळा चर्चेत येत असते. जनाईने जेव्हा २३वा वाढदिवस साजरा केला, त्यावेळी क्रिकेटर मोहम्मद सिराजसोबतच्या फोटोमुळे ती चर्चेत आली होती. त्या चर्चांना लगेचच पूर्णविराम मिळाला. पण सिराज आणि जनाई यांच्यात चांगली मैत्री असून, ती नेहमी त्याचे कौतुक करणाऱ्या पोस्ट सोशल मीडियावर शेअर करत असते. आजही सिराजने ५ बळी घेत सामना जिंकवल्यानंतर तिने खास पोस्ट केली. सिराजला चाहते प्रेमाने 'मियाँ मॅजिक' म्हणतात. त्याच अनुषंगाने तिने पोस्टवर कॅप्शन लिहिले. 'जेव्हा कुठलीही गोष्ट चांगली घडत नाही, तेव्हा जादू (MAGIC) घडते' अशी इन्स्टास्टोरी तिने पोस्ट केली.
सिराज विजयानंतर काय म्हणाला?
"आम्ही जिंकलोय याचा मला खूप आनंद आहे. मला माझ्या भावना शब्दांत मांडता येऊ शकत नाहीत. काल जेव्हा माझ्याहातून कॅच सुटला, तेव्हा मला वाटलं होतं की सामना आमच्या हातून निसटला. कारण काल जर त्यावेळी हॅरी ब्रूक आउट झाला असता तर आम्ही खूप आधीच जिंकलो असतो. पण ब्रूकच्या विकेटनंतरही आम्ही जो कमबॅक केला, त्यामुळे आम्हाला आनंद वाटला. कालच्या चुकीनंतर मी आज सकाळी उठलो आणि गुगलवरून Believe म्हणजे स्वत:वर विश्वास ठेवण्याचा फोटो डाऊनलोड केला आणि तो मोबाईलच्या वॉलपेपरवर लावून मनाशी ठरवलं की मी हे नक्कीच करू शकतो. आमचा आमच्या संघावर विश्वास होता. त्यामुळेच आम्ही सामना जिंकलो. आणि त्याचा आम्हा सर्वांना खूप आनंद आहे," असे सिराज म्हणाला.