IND vs ENG 3rd Test Shubman Gill Was Furious At The English Opening Pair : लंडन येथील लॉर्ड्सच्या मैदानात सुरु असलेल्या भारत-इंग्लंड यांच्यातील तिसऱ्या कसोटी सामन्यातील तिसऱ्या दिवसाच्या अखेरीस इंग्लंडच्या संघाने आपल्या दुसऱ्या डावाची सुरुवात केली आहे. भारतीय संघाचा पहिला डावही इंग्लंडप्रमाणे ३८७ धावांवरच आटोपला. इंग्लंडच्या ऐतिहासिक मैदानात पहिल्यांदाच कसोटीत दोन्ही संघांनी पहिल्या डावात समान धावा केल्याचे पाहायला मिळाला. पण त्यानंतर इंग्लंडच्या संघाने डावाला सुरुवात केल्यावर दिवसाअखेरच्या शेवटच्या षटकात मैदानात चांगलाच ड्रामा पाहायला मिळाला. इंग्लंडच्या सलामीवारांच्या नौटंकीनंतर शुबमन गिल भडकल्याचे पाहायला मिळाले.
भारतीय संघाचा डाव संपल्यावर इंग्लंडच्या संघाने आपल्या दुसऱ्या डावाची सुरुवात केली. पण दिवसाअखेर अधिक षटके खेळणं टाळण्यासाठी सलामीवीरांनी बुमराहच्या पहिल्या षटकात 'टाइम पास'चा डाव खेळला. यावर भारतीय संघाचा कर्णधार शुबमन गिल सलामीवीरांवर भडकला. तो आधी झॅक क्राउलीकडे गेला. दोघांच्यात शाब्दिक खेळ रंगल्याचे पाहायला मिळाले. त्यानंतर शुबमन गिल नॉन स्ट्राइकवर असलेल्या बेन डकेटच्या नजरेला नजर भिडवत आपला राग व्यक्त करताना दिसून आले. तिसऱ्या दिवसाअखेर वातावरण चांगलेच तापले होते. सोशल मीडियावर मैदानातील दृश्याचे फोटो आणि व्हिडिओ व्हयरल होत आहेत.
दुसऱ्या डावाची सुरुवात झाल्यावर इंग्लंडच्या सलामीवीरांनी जो डाव खेळला तो शेवटी यशस्वी ठरला. एका षटकानंतरच तिसऱ्या दिवसाचा खेळ संपल्याची घोषणा मैदानातील पंचांनी केली. खेळ थांबला त्यावेळी झॅक क्राॉउलीनं पहिले षटक खेळून २ धावा काढल्या होत्या. दुसऱ्या बाजूला बेन डकेट चेंडू न खेळता नाबाद परतला.