टी२० मध्ये अजून कुणाचे ३०० षटकारही नाहीत; पण भज्जी म्हणतो, 'हा' खेळाडू १००० षटकार ठोकणार!

Most Sixes in T20I: आंतरराष्ट्रीय टी-२० क्रिकेटमध्ये अजून कोणत्याही खेळाडूला ३०० षटकारांचा टप्पा गाठता आली. परंतु, हरभजनसिंह यांच्या मते, भारतीय संघात असा एक खेळाडू आहे, जो १००० षटकार मारू शकतो.

भारतीय क्रिकेट संघाचा माजी दिग्गज फिरकीपटू हरभजन सिंगने युवा सलामीवीर अभिषेक शर्माच्या फलंदाजीवर फिदा होऊन एक खळबळजनक भाकीत केले आहे. भारत आणि न्यूझीलंड यांच्यातील पहिल्या टी-२० सामन्यात अभिषेकची स्फोटक खेळी पाहिल्यानंतर भज्जी म्हणाला की, जर अभिषेकला रोहित शर्मा आणि विराट कोहली इतके सामने खेळायला मिळाले, तर तो टी-२० क्रिकेटमध्ये १००० षटकार मारण्याचा विक्रम करू शकतो.

न्यूझीलंडविरुद्धच्या पहिल्या टी-२० सामन्यात अभिषेक शर्माने अवघ्या काही चेंडूत ८४ धावांची धडाकेबाज खेळी केली. या खेळीत त्याने तब्बल ८ उत्तुंग षटकार ठोकले. हरभजनच्या मते, अभिषेकची फलंदाजी करण्याची पद्धत आणि त्याची मानसिकता त्याला इतरांपेक्षा वेगळी ठरवते. "तो स्वतःच्या शतकाचा विचार करत नाही, तर संघाला वेगवान सुरुवात करून देण्यावर त्याचा भर असतो. गोलंदाजांकडे त्याच्या फटक्यांचे कोणतेही उत्तर नाही," असे भज्जीने आपल्या यूट्यूब चॅनेलवर म्हटले.  

खेळाडू	डाव	षटकार
रोहित शर्मा	१५१	२०५
सूर्यकुमार यादव	९४	१५६
विराट कोहली	११७	१२४
हार्दिक पंड्या	९८	१०७
केएल राहुल	६८	९९
अभिषेक शर्मा	३३	८१

टी-२० आंतरराष्ट्रीय क्रिकेटमध्ये भारतासाठी सर्वाधिक षटकार मारणाऱ्यांच्या यादीत सध्या रोहित शर्मा अव्वल आहे. मात्र, अभिषेक ज्या वेगाने धावा करतोय, ते पाहता तो सर्वांना मागे टाकेल असा विश्वास व्यक्त होत आहे.