मनपा निवडणुकीसाठी इच्छुकांनी केली स्वतःच्याच उमेदवारीची घोषणा; नेत्यांच्या भुवया उंचावल्या!

छत्रपती संभाजीनगर महापालिकेची निवडणूक मागील पाच वर्षांपासून झालेली नाही. त्यामुळे इच्छुकांची संख्या बरीच वाढली आहे.

- मूजीब देवणीकर

छत्रपती संभाजीनगर : महापालिका निवडणुकीची प्रक्रिया सध्या जोरात सुरू असताना बहुतांश इच्छुक उमेदवारांनी आपल्या उमेदवारीची घोषणा सोशल मीडियावर करून टाकली. त्यामुळे संबंधित पक्षातील नेत्यांच्या भुवया उंचावल्या आहेत. कोणत्याही पक्षात परस्पर उमेदवारीची घोषणा करण्याची पद्धत नाही. अनेक प्रभागांत तर एका जागेसाठी आठ ते दहाजण इच्छुक असल्याची स्थिती आहेत. त्यामुळे स्पर्धेत असलेल्या उमेदवारांमध्ये राजकीय कलह निर्माण होत आहे. काहींनी तर पक्षश्रेष्ठींकडे या कृतीच्या तक्रारीही सुरू केल्याची माहिती समोर येत आहे.

छत्रपती संभाजीनगर महापालिकेची निवडणूक मागील पाच वर्षांपासून झालेली नाही. त्यामुळे इच्छुकांची संख्या बरीच वाढली आहे. सर्वोच्च न्यायालयाने जानेवारी अखेरपर्यंत निवडणुका घ्या, असे आदेश दिले. त्यामुळे राज्य निवडणूक आयोग आणि महापालिका प्रशासन जोमाने कामाला लागले आहे. अगोदर प्रभाग तयार करण्यात असून ११५ नगरसेवक निवडण्यासाठी २९ प्रभाग निश्चित केले. प्रभागाची आरक्षण प्रक्रियाही पार पडली. आता मतदार याद्या अंतिम करण्याचे काम सुरू आहे. आरक्षणाची प्रक्रिया पार पडताच इच्छुक उमेदवार आपापल्या सोयीच्या प्रभागातील एका जागेवर बोट ठेवून आहेत. सोशल मीडियावर इच्छुक उमेदवारांनी तर आपण प्रभागातील कोणत्या जागेवर लढणार हेसुद्धा घोषित करून टाकले. त्यामुळे कार्यकर्त्यांमध्ये संभ्रमाचे वातावरण आहे. कारण एका जागेसाठी किमान ८ ते १० जण इच्छुक आहेत. काही ठिकाणी तर उमेदवारच भेटत नाहीत. सध्या उमेदवारीसाठी सर्वाधिक स्पर्धा भाजपा, उद्धवसेना आणि एमआयएम पक्षाकडे आहे.

सर्वेक्षणानंतर उमेदवारी ठरेल
इच्छुकांनी ‘कमळ’ म्हणून जनतेत जायला हरकत नाही. संबंधित प्रभागात इच्छुकाला नागरिक किती पसंती देतात, हे सर्वेक्षणात ठरेल. त्यानंतर पक्ष कोणाला एकाला उमेदवारी देईल. एवढ्या मोठ्या प्रभागात जनतेसमोर जाण्याचे साधन म्हणजे सोशल मीडिया आहे. त्यामुळे काहींनी प्रचार, प्रसार सुरू केला असेल.
- किशोर शितोळे, शहराध्यक्ष, भाजपा.

उमेदवारी पक्ष ठरवेल
सोशल मीडियावर कोणी उमेदवारी जाहीर करीत असेल तर ते योग्य नाही. पक्ष ठरवेल कोणाला उमेदवारी द्यायची. हा निर्णय सर्व कार्यकर्त्यांना मान्य करावा लागेल.
- शेख युसूफ, काँग्रेस

...तर पक्षाकडून कारवाई
सोशल मीडियावर स्वत:ची उमेदवारी जाहीर करणे योग्य नाही. अलीकडेच पक्ष स्तरावर आम्ही इच्छुकांना सूचना दिली होती. त्यानंतरही कोणी अशा पद्धतीच्या पोस्ट टाकत असतील तर ते चुकीचे आहे. त्यांच्यावर पक्षाकडून कारवाई केली जाईल. उमेदवारी देण्याचा निर्णय कोअर कमिटी घेईल.
-शहारेख नक्षबंदी, शहराध्यक्ष, एमआयएम

उमेदवारीचा निर्णय पक्ष घेईल
महापालिका निवडणुकीसाठी इच्छुक आपली उमेदवारी सोशल मीडियावर जाहीर करीत असले तरी आमच्या पक्षाचे नेते एकनाथ शिंदे यांचा चमू येथील प्रत्येक प्रभागात जाऊन सर्वेक्षण करणार आहे. जनतेच्या सुखदु:खात सहभागी होणारा आणि सर्वेत क्रमांक १ वर असलेल्या पदाधिकारी, कार्यकर्त्यास पक्षाकडून उमेदवारी दिली जाईल. कोणाच्या सांगण्यावरून उमेदवारी मिळणार नाही.
- राजेंद्र जंजाळ, जिल्हाप्रमुख, शिंदेसेना