Post Office KVP Scheme : जर तुम्हाला तुमची बचत सुरक्षित ठिकाणी गुंतवून चांगला परतावा मिळवायचा असेल, तर पोस्ट ऑफिसच्या योजना तुमच्यासाठी उत्तम पर्याय आहेत. या योजनांमध्ये सरकार तुमच्या पैशांच्या सुरक्षिततेची हमी देते आणि उत्तम व्याजदरही मिळतो. पोस्ट ऑफिस वेगवेगळ्या वयोगटांसाठी आणि लोकांसाठी अनेक लहान बचत योजना चालवते. त्यापैकीच एक खास योजना म्हणजे किसान विकास पत्र (KVP) योजना, जी तुमच्या पैशांना फक्त ११५ महिन्यांत (जवळपास ९ वर्षे ७ महिने) दुप्पट करण्याची हमी देते. चला, या योजनेबद्दल सविस्तर जाणून घेऊया.
फक्त १,००० रुपयांपासून सुरुवात, गुंतवणुकीला मर्यादा नाही!
आज प्रत्येकजण भविष्यात आर्थिक समस्या येऊ नयेत म्हणून बचत करतो आणि गुंतवणूक करतो. पोस्ट ऑफिसच्या किसान विकास पत्र योजनेची सर्वात आकर्षक गोष्ट म्हणजे यातील गुंतवणुकीवर कोणताही धोका नाही. या योजनेत तुम्ही किमान १,००० रुपयांपासून गुंतवणूक सुरू करू शकता. विशेष म्हणजे, तुम्ही कितीही रक्कम गुंतवू शकता, त्यावर कोणतीही मर्यादा नाही. त्यामुळे, तुम्हाला हवी तितकी गुंतवणूक तुम्ही यात करू शकता.
७.५% चा मजबूत व्याजदर आणि ११५ महिन्यांची मुदत
पोस्ट ऑफिसच्या या किसान विकास पत्र योजनेत सरकार सध्या ७.५० टक्के दराने व्याज देते. हे व्याजदर वार्षिक आधारावर दिले जाते. या योजनेचा मॅच्युरिटी कालावधी ११५ महिने आहे. म्हणजेच, ९ वर्षे ७ महिन्यांत तुमचे गुंतवलेले पैसे दुप्पट होतात. तुम्ही KVP योजनेत सिंगल (एक व्यक्ती) आणि डबल (दोन व्यक्ती) दोन्ही प्रकारची खाती उघडू शकता.
अनेक खाती उघडण्याची सुविधा आणि मुलांसाठीही योजना
या सरकारी योजनेची आणखी एक खासियत म्हणजे, एक व्यक्ती कितीही KVP खाती उघडू शकते, यावर कोणतीही मर्यादा नाही. त्यामुळे, तुम्हाला दोन किंवा त्याहून अधिक खाती उघडायची असतील तर तुम्ही तसे करू शकता. तसेच, १० वर्षांपेक्षा जास्त वयाच्या मुलाच्या नावानेही तुम्ही किसान विकास पत्र योजनेत खाते उघडू शकता.
पैसे दुप्पट होण्याचे गणित कसे काम करते?
ही योजना गुंतवणूकदारांची पहिली पसंती बनण्याचे मुख्य कारण म्हणजे यात पैसे दुप्पट होतात. या सरकारी योजनेत तुमच्या गुंतवणुकीवरील व्याज चक्रवाढीच्या आधारावर मोजले जाते. याचा अर्थ, दरवर्षी मिळणारे व्याज तुमच्या मूळ रकमेत जमा होते आणि पुढच्या वर्षी त्यावरही व्याज मिळते, ज्यामुळे तुमची रक्कम वेगाने वाढते.
उदाहरणार्थ
समजा तुम्ही १ लाख रुपये गुंतवले.
७.५% व्याजदरावर पहिल्या वर्षाच्या शेवटी तुम्हाला ७,५०० रुपये व्याज मिळेल. ही रक्कम तुमच्या मूळ रकमेत (१,००,००० रुपये) जोडली जाईल, आणि तुमची रक्कम १,०७,५०० रुपये होईल.
दुसऱ्या वर्षी, तुम्हाला १,०७,५०० रुपये वर व्याज मिळेल, जे ८,०६२ रुपये असेल. आता तुमची एकूण रक्कम १,१५,५६२ रुपये होईल.
अशा प्रकारे, ही रक्कम चक्रवाढ पद्धतीने वाढत जाईल आणि ११५ महिन्यांच्या शेवटी (जवळपास ९ वर्षे ७ महिने) तुमचे १ लाख हे २ लाख रुपये होतील.
वाचा - देशात ७० तास कामाची चर्चा; पण 'या' राज्याने घेतला मोठा निर्णय; आता फक्त १० तास काम, जास्त केलं तर...
जर तुम्ही ५ लाख रुपये गुंतवले, तर याच पद्धतीने चक्रवाढ व्याज मिळत राहील आणि मुदतपूर्तीनंतर तुम्हाला १० लाख रुपये मिळतील. त्यामुळे, सुरक्षित आणि दुप्पट परताव्यासाठी ही एक उत्तम योजना आहे.