Rapido-Ownly : आजकाल ऑनलाइन फूड ऑर्डर करून घरबसल्या जेवणाचा आस्वाद घेणे ही सामान्य गोष्ट झाली आहे. ही वाढती बाजारपेठ पाहून आता नवीन खेळाडू या क्षेत्रात उडी घेत आहेत. देशातील प्रसिद्ध राईड-हेलिंग सेवा 'रॅपिडो' आता फूड डिलिव्हरी मार्केटमध्ये धमाकेदार एंट्री करत आहे! रॅपिडोने आपल्या नवीन सेवेला 'ओन्ली' असे नाव दिले आहे. रॅपिडोने आपल्या या निर्णयातून थेट झोमॅटो आणि स्विगी सारख्या दिग्गजांना आव्हान दिले आहे. 'ओन्ली' च्या माध्यमातून रॅपिडो फूड डिलिव्हरीशी संबंधित सर्व अतिरिक्त शुल्क काढून टाकणार आहे, जे आतापर्यंत ग्राहकांना भरावे लागत होते. यात डिलिव्हरी फी, पॅकेजिंग शुल्क आणि इतर लपवलेले कर यांचा समावेश आहे.
रॅपिडो-ओन्लीमध्ये काय खास आहे?
रॅपिडोच्या नवीन 'ओन्ली' सेवेचा सर्वात मोठा दावा हाच आहे की, ग्राहकांना जेवण त्याच किमतीत मिळेल ज्या किमतीत ते हॉटेल किंवा रेस्टॉरंटमध्ये मिळते. म्हणजेच, मेनू कार्डवर जी किंमत असेल, तीच किंमत तुमच्या दारापर्यंत पोहोचवल्या जाणाऱ्या जेवणाची असेल. कोणताही डिलिव्हरी चार्ज नाही, पॅकेजिंग चार्ज नाही! हे ग्राहकांसाठी एक मोठे आकर्षण ठरणार आहे.
रेस्टॉरंट्सनाही मोठा फायदा!
केवळ ग्राहकांनाच नाही, तर 'ओन्ली' चे मॉडेल रेस्टॉरंट्ससाठीही खूप फायदेशीर आहे. झोमॅटो आणि स्विगीसारख्या कंपन्या रेस्टॉरंट्सकडून २५ ते ३०% पर्यंत मोठे कमिशन घेतात. मात्र, रॅपिडो केवळ नाममात्र आणि निश्चित सबस्क्रिप्शन फी आकारणार आहे. यामुळे रेस्टॉरंट्सना त्यांच्या उत्पादनातून अधिक नफा (मार्जिन) मिळेल, ज्यामुळे ते आनंदी होतील.
४० लाख रायडर्सचे मजबूत नेटवर्क
रॅपिडोकडे आधीच ४० लाख 'कॅप्टन' (रायडर्स) चे एक मोठे नेटवर्क आहे. या रायडर्सचा वापर आता अन्न वितरणासाठीही केला जाईल. यामुळे रॅपिडोला डिलिव्हरीमध्ये लॉजिस्टिक्सची कोणतीही समस्या येणार नाही, तसेच जेवण जलद गतीने पोहोचण्यास मदत होईल. हे रॅपिडोसाठी एक 'गेम चेंजर' ठरू शकते.
झोमॅटो आणि स्विगीची चिंता वाढली?
रॅपिडोच्या या घोषणेनंतर, झोमॅटो आणि स्विगीसारख्या सध्याच्या मोठ्या कंपन्यांच्या व्यवसायाच्या धोरणांवर प्रश्नचिन्ह निर्माण झाले आहे. ग्राहक आता पारदर्शक किमती आणि स्वस्त पर्यायांकडे आकर्षित होत आहेत. अनेक वापरकर्त्यांनी सोशल मीडियावर या निर्णयाचे स्वागत करत म्हटले आहे की, "आता स्वस्त अन्न फक्त रेस्टॉरंटमध्येच नाही, तर घरी देखील त्याच दरात मिळेल."
वाचा - ट्रेन प्रवासाची चिंता मिटली! आता २४ तास आधीच मिळेल कन्फर्म सीटची अपडेट, कधीपासून लागू होणार?
भारतातील अन्न वितरण बाजारपेठ वेगाने वाढत असून, त्याचे मूल्य सुमारे ४० लाख कोटी रुपयांपर्यंत पोहोचण्याचा अंदाज आहे. अशा परिस्थितीत, रॅपिडोच्या या नव्या प्रवेशामुळे बाजारात कमी किमती आणि अधिक पारदर्शकतेचा एक नवीन ट्रेंड सुरू होण्याची शक्यता आहे. यामुळे स्पर्धा वाढेल आणि ग्राहकांना अधिक चांगले पर्याय मिळतील अशी अपेक्षा आहे.