भाजप-शिंदेसेनेत लागली होती बिनविरोधची चढाओढ

ठाणे महापालिकेत आपले शिलेदार बिनविरोध निवडून आणण्यासाठी शिंदे सेनेनी दोन दिवस आधाची फिल्डिंग लावली.

ठाणे : कल्याण-डोंबिवलीत भाजपला १४ उमेदवारांना बिनविरोध विजयी करता आल्याने ठाण्यातही बिनविरोध उमेदवार निवडून आणण्याकरिता एकनाथ शिंदे यांनी केलेल्या प्रयत्नाला यश आले व सात उमेदवार बिनविरोध विजयी झाले. उद्धवसेना व काँग्रेसच्या उमेदवारांनी मैदान सोडल्याने शिंदेसेनेच्या प्रयत्नांना मोठे यश लाभले.

ठाणे महापालिकेत आपले शिलेदार बिनविरोध निवडून आणण्यासाठी शिंदे सेनेनी दोन दिवस आधाची फिल्डिंग लावली. उमेदवारी अर्ज छाननीत विरोधी पक्षातील काही जणांचे अर्ज बाद झाले. त्याचा फायदा शिंदे सेनेला झाला, गुरुवारी रात्री सुरू झालेल्या बैठकीत चार ते पाच उमेदवार बिनविरोध निवडून आणण्याची समीकरणे ठरविली.

विरोधी उमेदवारांशी पहाटेच संपर्क
पहाटे चार वाजल्यापासून जे शिल्लक उमेदवार आपल्या पक्षातील उमेदवारांसमोर उभे होते, त्यांना गाठण्याची रणनीती ठरविण्यात आली. काही ठिकाणी उद्धवसेना आणि काँग्रेसच्या उमेदवारांनी ऐनवेळी कच खाल्ल्याचे दिसले. विरोधी पक्षातील उमेदवारांना माघार घेण्यासाठी त्यांच्या घरापासून ते कुठे असतील त्याठिकाणी जाऊन पहाटेच संपर्क साधून भेटीगाठी घेण्यात आल्या.