परभणी मनपात हायव्होल्टेज ड्रामा! प्रचार परवानग्यांसाठी उमेदवारांनी गाठलं आयुक्तांचं केबिन

परभणीत उमेदवारांचा 'प्रक्षोभ'! परवानग्यांसाठी मनपाच्या ढिसाळ कारभाराचा फटका; आयुक्तांच्या दालनात ठिय्या

- राजन मंगरूळकर 
परभणी: महानगरपालिका निवडणुकीच्या प्रचाराला वेग आला असतानाच, प्रशासकीय परवानग्यांच्या प्रक्रियेतील दिरंगाईमुळे उमेदवारांचा संयम सुटला आहे. गेल्या दोन दिवसांपासून परवानग्यांसाठी चकरा मारणाऱ्या विविध पक्षांच्या उमेदवारांनी आणि पदाधिकाऱ्यांनी मंगळवारी सकाळी थेट मनपा आयुक्तांचे दालन गाठले. मनपा आणि आरटीओ विभागाच्या ढिसाळ नियोजनाबद्दल तीव्र निषेध व्यक्त करत ही प्रक्रिया तातडीने सुलभ करण्याची मागणी यावेळी करण्यात आली.

कामात सुसूत्रता आणण्याचे आश्वासन निवडणूक प्रचारासाठी वाहने, ध्वनिक्षेपक आणि सभांच्या परवानग्या मिळवण्यासाठी एक खिडकी योजना कागदावरच असल्याचे दिसून आल्याने उमेदवार संतप्त झाले होते. यावेळी आयुक्त नितीन नार्वेकर आणि आरटीओ अधिकारी आशिष पाराशर यांच्याशी उमेदवारांनी जोरदार चर्चा केली. वाढती गर्दी पाहता प्रवेशद्वारांची संख्या वाढवणे आणि कर्मचाऱ्यांचे मनुष्यबळ वाढवून प्रक्रिया जलद करण्याचे आश्वासन आयुक्तांनी दिले.

या आंदोलनात काँग्रेसचे भगवानराव वाघमारे, अमोल जाधव, दिलीपसिंह ठाकूर यांच्यासह अनेक अपक्ष आणि प्रमुख पक्षांचे उमेदवार मोठ्या संख्येने उपस्थित होते. "प्रचारासाठी आधीच वेळ कमी आहे, त्यात तांत्रिक कामात आमचा वेळ वाया जात आहे," अशी भावना उमेदवारांनी यावेळी व्यक्त केली.