मुंबई महापालिकेची निवडणूक मविआ एकत्र लढणार की नाही? शरद पवार म्हणाले, "उद्धव ठाकरेंच्या शिवसेनेची..."

MVA BMC Election: सर्वोच्च न्यायालयाच्या आदेशानंतर राज्यात महापालिका आणि स्थानिक स्वराज्य संस्थांच्या निवडणुकीची लगबग सुरू झाली आहे. मुंबईतील राजकीय वातावरण तापू लागले असून, मविआ एकत्र लढणार की नाही, याबद्दल अद्याप स्पष्टता आलेली नाही. त्या पार्श्वभूमीवर शरद पवारांना प्रश्न विचारण्यात आला. 

BMC Election Sharad Pawar: मुंबई महापालिकेच्या निवडणुकीकडे सगळ्यांचेच लक्ष असणार आहे. अनेक वर्षांपासून ठाकरेंच्या शिवसेनेकडे असलेली मुंबई महापालिका यावेळी कुणाकडे जाणार, याबद्दल उत्सुकता आहे. दुसरी बाब म्हणजे मुंबई महापालिका निवडणूक महाविकास आघाडी एकत्र लढणार की स्वतंत्र? हे चित्र अद्याप स्पष्ट झालेले नाही. दुसरीकडे ठाकरे बंधू एकत्र येण्याचीही चर्चा सुरू आहे. याचसंदर्भात शरद पवारांना प्रश्न विचारण्यात आला. त्यावर त्यांनी राजकीय भूमिका स्पष्ट केली.  

'लोकमत'चं WhatsApp चॅनल फॉलो करा!

शरद पवारांची पुण्यात पत्रकार परिषद झाली. यावेळी त्यांनी विविध मु्द्द्यांवर भाष्य केले. महापालिका, स्थानिक स्वराज्य संस्थांच्या निवडणुकीबद्दल काय निर्णय झाला आहे? असा प्रश्न शरद पवारांना विचारण्यात आला होता. 

महापालिका, स्थानिक स्वराज्य संस्था मविआ एकत्र लढवणार का?

शरद पवार म्हणाले, "निर्णय काही घेतलेला नाही. आमचा अंदाज असा आहे की, सर्वोच्च न्यायालयाने एक निकाल दिला. त्या निकालानुसार निवडणूक घेतली जाणार आहे. निवडणुकीची प्रक्रिया सुरू होईल. आमचा प्रयत्न आहे, निर्णय अद्याप नाही. कारण आम्ही अजून चर्चा केलेली नाही."

वाचा >>"हिंदी भाषा सक्ती असू नये, पण विद्यार्थ्यांनी द्वेष करु...", भाषेवरुन शरद पवारांनी स्पष्टच सांगितलं

"काँग्रेस आहे, आमचा राष्ट्रवादी काँग्रेस आहे. उद्धव ठाकरेंच्या नेतृत्वाखालील शिवसेना आहे. शेतकरी कामगार पक्ष आणि इतर छोटे पक्ष आहे. आम्ही एकत्र बसू. एकत्र निवडणुकीला सामोरं जाता येईल का, याचा विचार करू. त्याचा अंतिम निर्णय करू. एकत्र निवडणूक लढवण्याची इच्छा आहे", असे शरद पवार म्हणाले. 

मुंबई महापालिका निवडणुकीत एकत्र की स्वबळावर?

मुंबईत महाविकास आघाडी म्हणून एकत्र लढणार की, मुंबई वगळून एकत्र लढणार? या प्रश्नाला उत्तर देताना पवार म्हणाले, "अजून काही चर्चा झालेली नाही. पण, मुंबईमध्ये आमच्या सगळ्यांच्या मध्ये अधिक शक्तीस्थान हे उद्धव ठाकरेंच्या शिवसेनेचं आहे. त्यामुळे त्यांना विचारात घ्यावं लागेल", असे शरद पवार यांनी मुंबई महापालिका निवडणुकीबद्दल बोलताना सांगितले.