AIMIM: राज्यात एमआयएमचा जोरदार धडाका; ५८ उमेदवार आघाडीवर, मुंबई-ठाण्यात 'पतंग' सुसाट!

AIMIM Maharashtra Results: राज्यातील महानगरपालिका निवडणुकीच्या निकालांनी सर्वांनाच चकित केले आहे. असदुद्दीन ओवेसी यांच्या एमआयएम पक्षाने ११ महानगरपालिकांमध्ये आपला प्रभाव पाडत तब्बल ५८ जागांवर आघाडी घेतली.

महाराष्ट्र स्थानिक स्वराज्य संस्था निवडणुकीच्या निकालांमध्ये असदुद्दीन ओवेसी यांच्या एमआयएम पक्षाने जबरदस्त कामगिरी करत सर्वांचे लक्ष वेधून घेतले आहे. राज्यभरातील ११ प्रमुख महानगरपालिकांमध्ये एमआयएमचे तब्बल ५८ उमेदवार सध्या आघाडीवर असून, मुंबई आणि ठाण्यासारख्या महत्त्वाच्या शहरांमध्ये पक्षाचे अनेक उमेदवार विजयी झाले आहेत.

निवडणुकीच्या सुरुवातीच्या कलांनुसार, मुंबईत एमआयएमचे ३ उमेदवार विजयी झाले आहेत. तर, ठाणे महानगरपालिकेत ५ उमेदवारांनी विजयाचा गुलाल उधळला आहे. एमआयएमचा बालेकिल्ला समजल्या जाणाऱ्या छत्रपती संभाजीनगरमध्ये १६ जागांवर पक्षाचे उमेदवार आघाडीवर असून, येथे एमआयएम मोठी ताकद म्हणून समोर येताना दिसत आहे.

या निवडणुकीत असदुद्दीन ओवेसी यांनी स्वतः मैदानात उतरून संपूर्ण राज्यात १९ झंझावाती सभा घेतल्या होत्या. या सभांना मिळालेला उत्स्फूर्त प्रतिसाद मतांमध्ये परावर्तित झाल्याचे चित्र निकालांवरून स्पष्ट होत आहे. विशेषतः मुस्लीम बहुल आणि दलित वस्त्यांमध्ये एमआयएमने महाविकास आघाडी आणि महायुतीसमोर मोठे आव्हान उभे केले.

दरम्यान, एमआयएमने नांदेडमध्ये ९ जागांवर आघाडी घेतली. धुळ्यात ८ उमेदवारांने आगेकूच केली आहे. तर, अमरावती आणि नागपूर या दोन्ही शहरांमध्येही एमआयएमच्या उमेदवारांनी समाधानकारक आघाडी घेतली आहे. एमआयएमच्या या वाढत्या प्रभावामुळे पारंपारिक राजकीय समीकरणांना मोठा धक्का बसला असून, आगामी काळात स्थानिक राजकारणात एमआयएमची भूमिका निर्णायक ठरणार असल्याचे स्पष्ट होत आहे.