‘सैयारा तू तो बदला नही है...’; काँग्रेसला गळती, अमित देशमुखांचा 'शायराना' पलटवार..!

माजी मंत्री आमदार अमित देशमुख यांनी पक्षांतर करणाऱ्यांवर थेट हल्ला करणे टाळत, अत्यंत सूचक आणि भावनिक टिप्पणी करत राजकीय वातावरण तापवले आहे.

- हणमंत गायकवाड
लातूर : स्थानिक स्वराज्य संस्थांच्या निवडणुकीच्या तोंडावर लातूर जिल्ह्यात काँग्रेस पक्षातून मोठ्या प्रमाणावर पक्षांतर सुरू झाल्याने पक्षाला मोठे धक्के बसले आहेत. पक्षातून महत्त्वाचे चेहरे बाहेर पडल्यामुळे काँग्रेसचे नुकसान होईल, अशी चर्चा सुरू झाली आहे. पक्षांतराच्या धक्क्यांचा मतदारांवर किती प्रभाव पडतो, हे लवकरच समजेल. दरम्यान, पक्षाचे नेते आणि माजी मंत्री आमदार अमित देशमुख यांनी पक्षांतर करणाऱ्यांवर थेट हल्ला करणे टाळत, अत्यंत सूचक आणि भावनिक टिप्पणी करत राजकीय वातावरण तापवले आहे.

जिल्ह्यात झालेले महत्त्वाचे पक्षांतर काँग्रेससाठी चिंतेचा विषय ठरला आहे. पक्षांतर केलेल्या नेत्यांनी नेतृत्वावर नाराजी दर्शवत किंवा राजकीय महत्त्वाकांक्षा पूर्ण करण्यासाठी पक्ष सोडला आहे. माजी आमदार त्र्यंबक भिसे, माजी नगराध्यक्ष लक्ष्मण कांबळे, माजी नगरसेवक गिरीश पाटील, जिल्हा बँकेचे माजी संचालक नाथसिंह देशमुख यांनी भाजपात प्रवेश केला आहे. तर माजी महापौर विक्रांत गोजमगुंडे यांनी राष्ट्रवादी काँग्रेस पक्षात (अजित पवार गट) प्रवेश करून हाती घड्याळ बांधले आहे. या प्रमुख नेत्यांनी काँग्रेसला रामराम ठोकल्याने जिल्ह्यातील पक्षाची ताकद कमी होईल, असे म्हणणे धाडसाचे ठरेल. पण एवढ्या मोठ्या स्थानिक नेत्यांचे काँग्रेसमधून पहिल्यांदाच पक्षांतर झाले आहे. त्यामुळे राजकीय वर्तुळात उलटसुलट चर्चेला उधाण आले आहे.

देशमुखांची मतदारांना भावनिक साद
या पार्श्वभूमीवर, आमदार अमित देशमुख यांनी अहमदपूर येथील महाविकास आघाडीच्या प्रचारसभेत पक्षांतर करणाऱ्यांवर शाब्दिक हल्ला करण्याऐवजी 'शायराना' पद्धतीने मतदारांना साद घातली. त्यांनी मतदारांना उद्देशून मार्मिक शब्दांत विधान केले.

‘सैयारा तू तो बदला नही है...मौसम जरा सा रुठा हुआ है’
देशमुख यांनी मतदारांना 'सैयारा' (निष्ठावान) असे संबोधले आहे. पक्षांतर झाले असले तरी, जनता आणि मतदारांनी आपली निष्ठा कायम ठेवावी. हे केवळ ''रुसलेले'' राजकीय वातावरण (मौसम) बदलण्याची जबाबदारी जनतेची आहे, असे भावनिक आवाहन त्यांनी केले. या सूचक टिप्पणीतून, पक्षांतरामुळे झालेल्या नुकसानीची भरपाई निष्ठावान मतदारांच्या पाठिंब्याने करण्याचा काँग्रेसचा प्रयत्न स्पष्ट दिसून येतो.

मतदारांवर कोणाचा प्रभाव..!
सध्या अहमदपूर, औसा, निलंगा, उदगीर नगरपरिषद आणि रेणापूर नगरपंचायतीच्या निवडणुकीची रणधुमाळी सुरू आहे. जिल्हा परिषद आणि लातूर महापालिकेची निवडणूकही आगामी काळात आहे. त्यामुळे पक्षांतराच्या या धक्क्यांचा आणि अमित देशमुखांच्या भावनिक आवाहनाचा मतदारांच्या निर्णयावर किती प्रभाव पडतो, हे पाहणे महत्त्वाचे ठरणार आहे.