IPL 2021 : RR vs PBKS T20 Live Score Update : कर्णधार म्हणून पहिल्याच सामन्यात प्रतिस्पर्धी फलंदाजांकडून झालेल्या वस्त्रहरणानंतर कमबॅक करणे सोपी गोष्ट नाही. पण, राजस्थान रॉयल्सचा नवनिर्वाचीत कर्णधार संजू सॅमसन ( Sanju Samson) यानं सोमवारी अविस्मरणीय खेळी केली.
पंजाब किंग्सच्या ( Punjab Kings) २२१ धावांचा पाठलाग करताना राजस्थान रॉयल्सचा ( Rajasthan Royals) सलामीवीर बेन स्टोक्स भोपळ्यावर माघारी परतला. त्यानंतर टप्प्याटप्यानं विकेट्स पडतच होत्या. पण, कर्णधार सॅमसन एक बाजूनं खिंड लढवत होता. त्यानं जोस बटलर व शिवम दुबे यांना सोबत घेऊन, RRसाठी मजबूत पाया तयार केला.
रियान परागनं तुफानी खेळी करून संजू सॅमसनच्या खांद्याला खांदा लावताना पंजाबच्या डगआऊटमध्ये टेंशनवालं वातावरण निर्माण केलं. जोस बटलर, शिवम दुबे आणि रियान पराग यांच्यासह संजूनं अनुक्रमे ४५ ( २६ चेंडू), ५३ ( ३३ चेंडू) आणि ५२ (२३ चेंडू) अशी भागीदारी केली.
संजू सॅमसननं आयपीएलमधील तिसरे शतक पूर्ण केले. त्यानं ५४ चेंडूंत १२ चौकार व ५ षटकारांसह हे शतक पूर्ण केलं. कर्णधार म्हणून पहिल्याच सामन्यात शतक करणारा तो पहिलाच खेळाडू ठरला. १२ व ३५ धावांवर असताना संजूला जीवदान मिळाले होते.
RRला विजयासाठी अखेरच्या चार षटकांत ४८ धावांची गरज असताना लोकेश राहुलनं संघातील अनुभवी गोलंदाज मोहम्मद शमीला पाचारण केलं. अखेरच्या ६ चेंडूंत १३ धावांची गरज होती अन् पहिल्या दोन चेंडूवर एकच धाव मिळाली. तिसऱ्या चेंडूवरही एकच धाव आली आणि तीन चेंडूंत ११ धावा अशी परिस्थिती निर्माण झाली.
संजूनं खणखणीत षटकार खेचून सामन्यातील चुरस कायम राखली. पाचव्या चेंडूवर संजूनं एक धाव न घेतल्यानं १ चेंडू ५ धावांची RRला गरज होती. संजूची अखेरच्या चेंडूवर विकेट पडली. संजू सॅमसन ६३ चेंडूंत १२ चौकार व ७ षटकारांसह ११९ धावांवर माघारी परतला अन् पंजाबनं ४ धावांनी सामना जिंकला.
आयपीएलमध्ये कर्णधार म्हणून शतक करणारा तो सहावा फलंदाज ठरला. यापूर्वी सचिन तेंडुलकर, अॅडम गिलख्रिस्ट, विराट कोहली, डेव्हिड वॉर्नर आणि लोकेश राहुल यांनी अशी कामगिरी केली आहे.
आयपीएलमध्ये धावांचा पाठलाग करताना शतक व्यर्थ जाण्याची ही दुसरी वेळ ठरली. यापूर्वी युसूफ पठाणनं २०१०मध्ये मुंबई इंडियन्सविरुद्ध ३७ चेंडूंत ८ षटकार व ९ चौकारासह १०० धावा केल्या होत्या. विशेष म्हणजे राजस्थान रॉयल्सनं तोही सामना चार धावांनी गमावला होता.
आयपीएलमध्ये सर्वाधिक ६ शतकांचा विक्रम ख्रिस गेलच्या नावावर आहे. त्यानंतर विराट कोहली ( ५), शेन वॉटसन व डेव्हिड वॉर्नर ( प्रत्येकी ४) आणि एबी डिव्हिलियर्स व संजू सॅमसन ( प्रत्येकी ३) यांचा क्रमांक येतो.