इंग्लंड संघानं पाकिस्तानविरुद्धची तीन सामन्यांची मालिका 1-0 अशी खिशात घातली. तिसऱ्या कसोटीत जेम्स अँडरसनच्या भेदक माऱ्यासमोर पाकिस्तानी फलंदाजांनी शरणागती पत्करली. अँडरसननं या सामन्यात पाकिस्तानचा कर्णधार अझर अलीची विकेट घेत विश्वविक्रमाला गवसणी घातली.
कसोटी क्रिकेटमध्ये 600 विकेट्स घेणारा तो जगातला पहिला जलदगती गोलंदाज ठरला आहे. यापूर्वी मुथय्या मुरलीधरन, शेन वॉर्न आणि अनिल कुंबळे या फिरकीपटूंनी हा पराक्रम केला आहे.
मुथय्या मुरलीधरन ( श्रीलंका ) 133 सामने व 800 विकेट्स, शेन वॉर्न ( ऑस्ट्रेलिया) 145 सामने व 708 विकेट्स, अनिल कुंबळे ( भारत) 132 सामने व 619 विकेट्स, जेम्स अँडरसन ( इंग्लंड ) 156 सामने व 600 विकेट्स आणि ग्लेन मॅक्ग्राथ ( ऑस्ट्रेलिया) 124 सामने व 563 विकेट्स हे कसोटीत सर्वाधिक विकेट्स घेणारे पाच गोलंदाज आहे.
150 कसोटी खेळणाराही जेम्स अँडरसन पहिला जलदगती गोलंदाज आहे. त्यानं 156 कसोटी सामन्यांत 33717 चेंडू टाकले आहेत. त्यानंतर कर्टनी वॉल्श यांचा ( 132 सामने व 30019 चेंडू) क्रमांक येतो.
वयाच्या तीशीनंतर सर्वाधिक विकेट्स घेणाऱ्या जलदगती गोलंदाजांत अँडरसनचा दुसरा क्रमांक येतो. त्यानं 85 सामन्यांत 332 विकेट्स घेतल्या आहेत, तर वॉल्श यांनी 81 सामन्यांत 341 विकेट्स नावावर केल्या आहेत.
अँडरसननं सर्वाधिक 9 वेळा चार फलंदाजांना बाद केलं आहे. त्यात सचिन तेंडुलकर, अझर अली, डेव्हिड वॉर्नर आणि मायकेल क्लार्क यांचा समावेश आहे.
अँडरसनने ऑस्ट्रेलियाविरुद्ध 32 सामन्यांत 3.05 इकॉनॉमीनं 104 विकेट्स घेतल्या आहेत. त्यानंतर दक्षिण आफ्रिका ( 93 विकेट्स), वेस्ट इंडिज ( 87), पाकिस्तान (74) आणि न्यूझीलंड ( 60) यांचा क्रमांक येतो
जेम्स अँडरसनच्या विकेट्सची विभागणी केली, तर त्यानं सर्वाधिक विकेट्स या भारताविरुद्ध घेतल्या आहेत.
भारताविरुद्ध जेम्स अँडरसननं 27 सामन्यांत 2.84 च्या इकॉनॉमीनं 110 विकेट्स घेतल्या आहेत. त्यामुळे अँडरसनच्या 600 विकेट्सच्या विक्रमात भारतीय फलंदाजांचा मोठा वाटा आहे आणि ही बाब अभिमानास्पद नक्कीच नाही.