बंगळुरू, राजस्थान आयपीएल संघांची लवकरच होणार विक्री?; हर्ष गोयंका यांच्या ट्वीटमुळे खळबळ

अमेरिकेच्या खरेदीदाराची राजस्थानवर नजर, आयपीएल २०२६ सुरू होण्याआधी प्रक्रिया आटोपली जाऊ शकते.

नवी दिल्ली : उद्योगपती हर्ष गोयंका यांनी गुरुवारी ट्वीट करीत इंडियन प्रीमियर लीगमधील (आयपीएल) बंगळुरू आणि राजस्थान संघाची लवकरच विक्री होणार असल्याचे संकेत दिले. या ट्वीटमुळे भारतीय क्रिकेटमध्ये सनसनाटी निर्माण झाली. नवे संघमालक अमेरिकेतीलही असू शकतात. राजस्थान संघ स्वत:कडे घेण्यास अमेरिकेतील खरेदीदार उत्सुक असल्याचे मानले जात आहे. 

हर्ष गोयंका हे लखनौ संघाचे मालक संजीव गोयंका यांचे मोठे भाऊ आहेत.  त्यांनी केलेल्या दाव्याला महत्त्व आहे. आयपीएल २०२६चा लिलाव डिसेंबरमध्ये अबूधाबी येथे होईल. दरम्यान, दोन्ही संघांचे मालक ठरले असल्याचेही त्यांच्या वक्तव्यातून जाणवत आहे. आयपीएल २०२६ सुरू होण्याआधी प्रक्रिया आटोपली जाऊ शकते.

खरेदीदार कोणत्या शहरातील?हर्ष यांनी लिहिले की, ‘मी ऐकले की एक नव्हे, तर दोन आयपीएल संघ (बंगळुरू आणि राजस्थान) विक्रीसाठी उपलब्ध आहेत. याचा अर्थ स्पष्ट आहे की, लोक चांगले मूल्यांकन कॅश करू इच्छितात. विक्रीसाठी दोन संघ आणि संभाव्य चार-पाच खरेदीदार उपलब्ध आहेत. यशस्वी खरेदीदार कोण असेल? पुढे, अहमदाबाद, मुंबई, बंगळुरू किंवा अमेरिकेतील असतील काय?’ या ट्वीटमध्ये अमेरिकेचा उल्लेख झाल्यामुळे अनेकांच्या भुवया उंचावल्या आहेत.

चॅम्पियन्सचे दाम दुप्पटएका वृत्तपत्राने प्रकाशित केलेल्या माहितीनुसार, फोर्ब्सने बंगळुरू संघाचे मूल्य २०२२ ला जवळपास एक अब्ज डॉलर निश्चित केले होते. २०२५ मध्ये संघ चॅम्पियन बनताच मूल्य दुप्पट झाल्याचे मानले जात आहे. याचा अर्थ, बंगळुरू संघ किमान २ अब्ज डॉलरमध्ये विकला जाऊ शकतो.

राजस्थानमध्ये शिल्पा शेट्टीची भागीदारीराजस्थान संघाची मालकी रॉयल्स स्पोर्ट्स ग्रुपकडे (इमर्जिंग मीडिया स्पोर्टिंग होल्डिंग्स लिमिटेड) आहे. या कंपनीचा ६५ टक्के वाटा असून, उर्वरित भागीदारी लाचलेन मर्डोक, रेडबर्ड कॅपिटल पार्टनर्स यांच्याकडे आहे. २००९ ला अभिनेत्री शिल्पा शेट्टी आणि तिचा पती राज कुंद्रा यांनी संघातील १२ टक्के भागीदारी खरेदी केली. 

बंगळुरूची किंमत २ अब्ज डॉलरबंगळरू संघाचे मालकी हक्क जोपासणाऱ्या डियागो इंडियाने ५ नोव्हेंबर रोजी संघ विक्रीस काढल्याची कबुली  दिली. पुण्यातील लस बनविणारी कंपनी सिरम इन्स्टिट्यूट ऑफ इंडियाचे मालक  अदर पूनावाला यांनी १ ऑक्टोबर रोजी ट्वीट करीत बंगळुरू संघाच्या विक्रीचे संकेत दिले होते. पूनावाला यांचे नावदेखील संभाव्य खरेदी इच्छुकांमध्ये असल्याचे बोलले जात आहे. स्टॉक एक्स्चेंज फायलिंगमध्येही डियागो आणि यूएसएलने ३० टक्के भागीदारी विकणार असल्याची माहिती सेबीलादेखील दिली होती. संघाची विक्री प्रक्रिया ३१ मार्च २०२६ पर्यंत पूर्ण करण्यात येईल, अशीही ग्वाही दिली होती.

बंगळुरू (२०२५ चा चॅम्पियन) मुख्यालय : बंगळुरू स्थापना : २००८ (आयपीएलची सुरुवात)  संघमालक : युनायटेड स्पिरिट्स लिमिटेड ( डियागो समूहाचा भाग)स्थानिक मैदान : एम. चिन्नास्वामी स्टेडियम, बंगळुरू ओळख : जगातील सर्वांत लोकप्रिय टी-२० संघांपैकी एकमुख्य चेहरा : विराट कोहली  

राजस्थान (२००८ चा चॅम्पियन) मुख्यालय : जयपूर स्थापना : २००८ (आयपीएलचे पहिले सत्र) संघमालक : रॉयल मल्टिस्पोर्ट्स प्रा. लि. (मनोज बदाडे, लचलान मर्डाक आदी)स्थानिक मैदान : सवाई मानसिंग स्टेडियम, जयपूर ओळख : सर्वाधिक युवा खेळाडूंना संधी देणारा संघ  मुख्य चेहरा : यशस्वी जैस्वाल