विराट रोहितला म्हणाला- तो बघ माझा ड्युप्लिकेट बसलाय...; 'छोटा चिकू'ने सांगितली आठवण (VIDEO)

Virat Kohli Meets His Childhood Look Like: विराट कोहलीच्या लहानपणीसारखा दिसणारा छोटा चिकू सध्या चर्चेचा विषय ठरलाय

Virat Kohli Chhota Cheeku Rohit Sharma: भारतीय क्रिकेट संघाचा स्टार फलंदाज विराट कोहली मैदानावर आपल्या आक्रमकतेसाठी ओळखला जातो. पण मैदानाबाहेर त्याचा प्रेमळ स्वभाव पुन्हा एकदा समोर आला आहे. न्यूझीलंडविरुद्धच्या पहिल्या वनडे सामन्यापूर्वी सराव सत्रादरम्यान विराटने त्याच्यासारख्याच दिसणाऱ्या एका लहान मुलाची भेट घेतली आणि त्याचे नाव चक्क 'छोटा चीकू' (Chota Cheeku) असे ठेवले. या घटनेचा व्हिडिओ आणि मुलाखत सोशल मीडियावर चांगलीच व्हायरल होत आहे.

कोण आहे हा 'छोटा चीकू'?

या लहान मुलाचे नाव गर्वित उत्तम (Garvit Uttam) असून तो हरयाणाच्या पंचकूला येथील रहिवासी आहे. आश्चर्याची गोष्ट म्हणजे, गर्वितचा चेहरा विराट कोहलीच्या लहानपणाच्या फोटोंशी कमालीचा मिळताजुळता आहे. एका जाहिरात कंपनीने विराटच्या बालपणीसारख्या दिसणाऱ्या मुलाचा शोध घेण्यासाठी मोहीम राबवली होती. त्यातूनच गर्वित समोर आला. त्यानंतर त्याला विराटला भेटण्यासाठी खास वडोदरा येथे बोलावण्यात आले.

विराट आणि रोहितची मजेशीर प्रतिक्रिया

गर्वितने एका मुलाखतीत सांगितले की, जेव्हा त्याने विराटला हाक मारली, तेव्हा विराटने त्याला पाहिले आणि तो त्याच्याजवळ आला. विराटने रोहित शर्मालाही जवळ बोलावले आणि गर्वितकडे बोट दाखवत म्हटले, "रोहित, तिकडे बघ माझा डुप्लिकेट बसला आहे!" रोहितनेही हसून दाद दिली. इतकेच नाही तर विराटने त्याला 'छोटा चीकू' म्हणत हाक मारली आणि त्याच्याशी हस्तांदोलन केले.

"आता मी तुझा मित्र..."

या भेटीदरम्यान विराटने गर्वितला एक खास वचनही दिले. विराटने त्याला सांगितले की, "आतापासून मी तुझा मित्र आहे." विराटच्या या साधेपणाने आणि लहान मुलाप्रती असलेल्या प्रेमाने चाहत्यांची मने जिंकली. या भेटीचे फोटो आणि व्हिडिओ इंटरनेटवर 'क्युटेस्ट व्हिडिओ' (Cutest Video) म्हणून शेअर केले जात आहेत.

दरम्यान, न्यूझीलंडविरुद्धच्या मालिकेत विराटने धावांचा पाऊस पाडण्यास सुरुवात केली असली, तरी मैदानाच्या बाहेर त्याच्या या 'छोट्या चीकू'सोबतच्या मैत्रीचीच जास्त चर्चा रंगली आहे.