मुंबईतील वानखेडेच्या मैदानात रंगलेल्या इंग्लंडविरुद्धच्या सेमीफायनलमध्ये अभिषेक शर्मा पुन्हा एकदा स्वस्तात माघारी फिरला. संजू सॅमसनसोबत डावाला सुरुवात केल्यावर त्याने दोन खणखणीत चौकार मारले. पण दुसऱ्या षटकात विल जॅक्स आला अन् टी-२० वर्ल्ड कप स्पर्धेत पुन्हा एकदा अभिषेक शर्मा ऑफ स्पिनरच्या जाळ्यात अडकला. दुसऱ्या षटकातील अखेरच्या षटकात मोठा फटका खरण्याच्या नादात त्याने विकेट फेकली. फिल सॉल्टनं सोपा झेल टिपत अभिषेक शर्माला ९ धावांवर तंबूचा रस्ता दाखवला.
अभिषेक शर्मा यंदाच्या टी-२० वर्ल्ड कप स्पर्धेत सातत्याने फिरकीसमोर फसला आहे. विकेट गमावण्याआधी त्याने विल जॅक्सला एक चौकार मारला. हा फटका मारल्यावर संजूनं त्याला स्वत:वर नियंत्रण ठेवत शांत खेळण्याचा इशारा केला होता. संजूनं हातवारे इशारा करत त्याला संयमी खेळी करण्याचा सल्ला दिला खरा. पण त्याला ते काही कळलेच नाही. विल जॅक्सच्या चेंडूवर तो पुढे येऊन फटका मारायला गेला. जॅक्सनं त्याची चाल ओळखून त्याच्या पायावर चेंडू टाकला. परिणामी त्याला तो फटका सीमारेषेबाहेर घालवता आला नाही. त्याच्यावर पाचव्या डावात तिसऱ्यांदा ऑफ स्पिनरसमोर बाद होण्याची नामुष्की ओढावली.
