T20 World Cup 2022, Scotland vs West Indies Live : ट्वेंटी-२० वर्ल्ड कप स्पर्धेत धक्कादायक निकालाचे सत्र दुसऱ्या दिवशीही कायम राहिले. स्पर्धेच्या पहिल्याच दिवशी पहिल्या फेरीत नामिबियाने आशिया चषक २०२२ विजेत्या श्रीलंकेला पराभूत केले. आज स्कॉटलंड सारख्या लिंबू टिंबू संघाकडून दोन वेळा वर्ल्ड कप उंचावणारा वेस्ट इंडिजचा संघ हरला. जॉर्ज मुन्सी ( George Munsey ) याने फलंदाजीत, तर मार्क वॅट ( Mark Watt) गोलंदाजीत कमाल दाखवताना विंडीजला पराभूत केले.
प्रथम फलंदाजी करताना स्कॉटलंडने ५ बाद १६० धावा केल्या. सलामीवीर जॉर्न मुन्सीने ५३ चेंडूंत ९ चौकारांच्या मदतीने नाबाद ६६ धावा केल्या. मिचेल जेम्सन ( २०), कॅलम मॅकलीओड ( २३), कर्णधार रिची बेरींगहॅम ( १६) व ख्रिस ग्रेव्हीस १६*) यांनीही योगदान दिले. विंडीजच्या अल्झारी जोसेफ ( २-२८) व जेसन होल्डर ( २-१४) यांनी प्रत्येकी दोन विकेट्स घेतल्या. विंडीज हे माफक लक्ष्य सहज पार करेल असे वाटत असताना स्कॉटलंडने आश्चर्याचा धक्का दिला. कायले मेयर्स ( २०) व एव्हिन लुईस ( १४) हे सलामीवीर अपयशी ठरले. त्यानंतर मार्क वॅट व ब्रॅड विल यांनी धक्क्यांमागून धक्के दिले.