अबु धाबी टी10 लीगला ( Abu Dhabi T10 League) गुरुवारपासून सुरूवात झाली आणि पहिल्याच सामन्यात संयुक्त अरब अमिरातीच्या फलंदाजानं तगड्या गोलंदाजांचा चुराडा केला. मराठा अरेबियन्स ( MARATHA ARABIANS ) संघाचे प्रतिनिधित्व करणाऱ्या अब्दुल शकूर ( Abdul Shakoor) यानं वेन पार्नेल, वाहब रियाझ या अनुभवी गोलंदाजांना धु धु धुतले. त्यानं २८ चेंडूंत ७ चौकार व ५ षटकार खेचून ७३ धावांची स्फोटक खेळी केली. त्यानं १४ चेंडूंत अर्धशतक पूर्ण केले. त्याच्या या फटकेबाजीनं मराठा अरेबियन्सनं ५ विकेट्स राखून नॉर्दन वॉरियर्सचा पराभव केला.
प्रथम फलंदाजी करताना वॉरियर्सनं १० षटकांत २ बाद १२७ धावा केल्या. लेंडल सिमन्सनं ३१ चेंडूंत ७ चौकार व १ षटकार खेचून नाबाद ५४ धावा केल्या. ब्रेंडन किंग ( २९), निकोलस पूरन ( १९) आणि रोव्हमन पॉवेल ( २२) यांनीही तुफान खेळी केली. लक्ष्याचा पाठलाग करताना अरेबियन्सनचे फलंदाज माघारी परतत असताना अब्दुल शकूरने एका बाजूनं खिंड लढवली आणि संघाला ५ बाद १३१ धावा करून देताना विजय निश्चित केला.