नवी दिल्ली : आयपीएल स्पॉट फिक्सिंगच्या आरोपांमुळे गोलंदाज एस श्रीसंतवर घातलेली आजीवन बंदी मागे घेण्यात आली असून त्याच्या बंदीचा काळ केवळ सात वर्षांचा करण्याचा निर्णय बीसीसीआयचे लोकपाल डी. के. जैन यांनी मंगळवारी सुनावला. श्रीसंतला 2013 मध्ये आयपीएल स्पॉट फिक्सिंगच्या आरोपवरून दिल्ली पोलिसांनी मुंबईतून अटक केली होती. त्यानंतर बीसीसीआयने श्रीसंतवर आजीवन बंदी घालण्याचा आणि 10 लाख रुपये दंड ठोठावण्याचा निर्णय घेतला होता. पण, आता त्याला दिलासा मिळाला असून 2020ला त्याच्या बंदीचा काळ संपुष्टात येणार आहे.
श्रीसंतने 27 कसोटी आणि 53 वन डे सामन्यात भारतीय संघाचे प्रतिनिधित्व केले आहे. त्याने कसोटीत 87 विकेट्स घेतल्या आहेत, तर वन डेत त्याच्या नावावर 75 विकेट्स आहेत. 2011च्या वर्ल्ड कप विजेत्या संघाचा तो सदस्य होता. इंडियन प्रीमिअर लीगच्या पाच मोसमात त्यानं 44 सामन्यांत 40 विकेट्स घेतल्या आहेत. श्रीसंतसह अजित चंडिला आणि अंकित चव्हाण यांना स्पॉट फिक्सिंग प्रकरणात दिल्ली पोलिसांनी मुंबईत अटक केली होती. याप्रकरणी 36 जणांना अटक केली होती. पण या 36 पैकी एकाही व्यक्तीवर आरोप सिद्ध होऊ शकले नाहीत. श्रीसंतने 2005 साली श्रीलंकेविरुद्ध नागपूर येथील एकदिवसीय सामन्यात आंतरराष्ट्रीय स्तरावर पदार्पण केले होते.
पाहा व्हिडीओ...