इंग्लंडची वेगवान गोलंदाज फ्रेया डेव्हिसने वयाच्या २९व्या वर्षी व्यावसायिक क्रिकेटमधून निवृत्ती जाहीर केली. क्रिकेटमधून निवृत्ती घेतल्यानंतर ती वकील म्हणून नवीन करिअर सुरू करणार आहे. यामुळे तिच्या १५ वर्षांच्या यशस्वी क्रिकेट कारकिर्दीचा शेवट झाला.
फ्रेया डेव्हिसने मार्च २०१९ मध्ये श्रीलंकेविरुद्ध टी-२० आंतरराष्ट्रीय सामन्यातून आंतरराष्ट्रीय क्रिकेटमध्ये पदार्पण केले. तिने इंग्लंडसाठी तिचा शेवटचा सामना २०२३ मध्ये ऑस्ट्रेलियाविरुद्ध खेळला. डेव्हिसने २०१९ ते २०२३ या काळात इंग्लंडसाठी एकूण ३५ आंतरराष्ट्रीय सामने (वन-डे आणि टी-२०) खेळले, ज्यात तिने ३३ विकेट्स घेतल्या.
देशांतर्गत क्रिकेटमधील कामगिरी
वयाच्या अवघ्या १४ व्या वर्षी ससेक्समधून तिने क्रिकेट कारकिर्दीची सुरुवात केली. तिने वेस्टर्न स्टॉर्म, साउथ ईस्ट स्टार्स, लंडन स्पिरिट, वेल्श फायर, सदर्न व्हायपर्स आणि हॅम्पशायर यांसारख्या विविध संघांचे प्रतिनिधित्व केले. २०१३ मध्ये ससेक्ससाठी काउंटी चॅम्पियनशिप जिंकण्यात तिने महत्त्वाची भूमिका बजावली. तसेच, २०१९ मध्ये महिला क्रिकेट सुपर लीगमध्ये ती सर्वाधिक विकेट्स घेणारी गोलंदाज होती. तिचा शेवटचा सामना २१ सप्टेंबर २०२५ रोजी हॅम्पशायर विरुद्ध लँकेशायर असा वन-डे कप फायनल होता, ज्यात तिच्या संघाने उपविजेतेपद मिळवले.
क्रिकेटनंतरची नवीन वाट
क्रिकेट खेळत असतानाही डेव्हिसने आपले शिक्षण सुरू ठेवले. तिने एलपीसी आणि एलएलएम पूर्ण केले आहे. आता ती क्रिकेटला रामराम ठोकत एक प्रशिक्षणार्थी वकील म्हणून नवीन प्रवासाला सुरुवात करणार आहे. इंग्लंड क्रिकेट बोर्डानेही तिच्या या नवीन वाटचालीसाठी शुभेच्छा दिल्या आहेत.
Web Title: Premier England pacer freya davies swaps cricket for law with shocking retirement at 29
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
