IPLशी स्पर्धा करायची स्वप्न बघत होता पाकिस्तान, आता PSLवर आली इतकी वाईट वेळ की...

IPL vs PSL, India vs Pakistan: पाकिस्तानची टी२० लीग सध्या मोठ्या संकटात सापडली आहे

IPL vs PSL, India vs Pakistan: ही भारतीय टी२० लीग तुफान यशस्वी झाल्यानंतर पाकिस्तानने त्याचे अनुकरण करत पाकिस्तान सुपर लीग सुरु केली. यावर्षी पाकिस्तान सुपर लीग थेट आयपीएलशी स्पर्धा करणार आहे. आयपीएल स्पर्धा २८ मार्चला सुरू होईल, तर पाकिस्तान सुपर लीग २६ मार्चला सुरू होणार आहे. त्यामुळे दोन्ही लीग साधारणत: एकाच वेळी खेळल्या जातील. पाकिस्तान लवकरच वेळापत्रक जाहीर करेल अशी अपेक्षा आहे. तत्पूर्वी, या पाकिस्तानी लीगवर एक मोठा धोका निर्माण झाला आहे. पाकिस्तान क्रिकेट बोर्डाला वेळापत्रकात बदल करावा लागू शकतो आणि तारीखही पुढे ढकलावी लागू शकते.

पाकिस्तान सुपर लीगला मोठा धोका

पाकिस्तानमध्ये तेलाच्या वाढत्या किमतीदरम्यान सरकारने इंधन वाचवण्यासाठी कठोर उपाययोजना जाहीर केल्या आहेत. या संकटाचा सामना करण्यासाठी आवश्यक असलेल्या कोणत्याही मार्गाने इंधनाचा वापर कमी करण्याचे सरकारचे उद्दिष्ट आहे. पाकिस्तानच्या पंजाब प्रांतात सरकारने सर्व शाळा, महाविद्यालये आणि विद्यापीठे ३१ मार्चपर्यंत बंद ठेवण्याचा निर्णय घेतला आहे. सरकारी कार्यालयांमध्येही घरून काम करण्याचे धोरण लागू करण्यात आले आहे. तशातच मार्चच्या अखेरीस लीगचा पहिला टप्पा सुरू होत असल्याने ही परिस्थिती PSL 2026 साठी एक मोठे आव्हान ठरू शकते.

वेळापत्रक पुढे ढकलले जाणार

लाहोर, कराची, रावळपिंडी आणि मुल्तान सारख्या शहरांमध्ये अनेक सामने खेळवण्यात येणार आहेत. पंजाबमधील शाळा आणि महाविद्यालये मोठ्या प्रमाणात बंद राहिल्याने स्टेडियमची क्षमता, सुरक्षा व्यवस्था, वाहतूक व्यवस्थापन आणि इतर लॉजिस्टिक समस्यांवर परिणाम होऊ शकतो. पाकिस्तानी मीडिया रिपोर्ट्सनुसार, या तणावाच्या पार्श्वभूमीवर PSLचे वेळापत्रक पुढे ढकलले जाऊ शकते. सध्या, स्पर्धा उशिरा होणार की पुढे ढकलली जाईल याबद्दल पीसीबीकडून कोणतेही अधिकृत विधान आलेले नाही. शिवाय, काही सामने स्थलांतरित केले जाऊ शकतात अशीही चर्चा आहे.

पाकिस्तान सुपर लीग २०२६ चे अंदाजे वेळापत्रक

पाकिस्तान सुपर लीगचा ११वा हंगाम २६ मार्च ते ३ मे या कालावधीत सुरू होण्याची अपेक्षा आहे. वृत्तानुसार, प्लेऑफ सामने रावळपिंडी आणि लाहोर येथे खेळले जातील. पहिला सामना गतविजेता लाहोर कलंदर्सचा सामना गद्दाफी स्टेडियमवर पहिल्यांदाच खेळणाऱ्या हैदराबाद ह्युस्टन किंग्जमनशी होईल. शिवाय, हंगामाच्या पहिल्या टप्प्यात सर्व संघ प्रत्येकी सात सामने खेळतील. त्यानंतर सहा संघ दुसऱ्या फेरीसाठी पात्र ठरतील, तीन गटांमध्ये विभागले जातील. प्रत्येक संघ या फेरीत तीन सामने खेळेल आणि त्यानंतर प्लेऑफ होईल. त्यानंतर, अंतिम सामना ३ मे रोजी लाहोरमध्ये खेळला जाईल.