नेपियर, भारत विरुद्ध न्यूझीलंड महिला क्रिकेट : भारताच्या पुरुष संघापाठोपाठ महिला संघानेही न्यूझीलंड दौऱ्याची विजयाने सुरुवात केली. न्यूझीलंडने विजयासाठी ठेवलेले 193 धावांचे लक्ष्य जेमिमा रॉड्रीग्ज ( नाबाद 81) आणि स्मृती मानधना ( 105) यांच्या फटकेबाजीच्या जोरावर भारताने सहज पार केले. महाराष्ट्राच्या पोरींच्या दमदार कामगिरीमुळे 2006 नंतर भारतीय महिलांनी प्रथमच न्यूझीलंड महिला संघावर न्यूझीलंडमध्ये विजय मिळवण्याचा पराक्रम केला. भारताने हा सामना 9 विकेट राखून सहज जिंकला आणि तीन सामन्यांच्या मालिकेत 1-0 अशी आघाडी घेतली. या विजयानंतर भारतीय संघातील खेळाडूने पुरुष संघाचा कर्णधार विराट कोहली आणि महेंद्रसिंग धोनी यांच्यासारखेच विजयाचे सेलिब्रेशन केले.
भारतीय पुरुष संघाने मंगळवारी न्यूझीलंडला पहिल्याच सामन्यात आठ विकेट्सने पराभूत केले. सामना संपल्यावर कोहली एका 'सेगवे' या दुचाकीवर उभा राहीला होता. या दुचाकीवरून त्याने मैदानात फेरफटकाही मारला. त्यानंतर कोहलीने चक्क धमेंद्र यांच्या खास स्टाईलमध्ये एक हात डोक्यावर आणि दुसरा हात कंबरेवर ठेवून डान्सही केला. कोहलीनंतर माजी कर्णधार महेंद्रसिंग धोनीनेही 'सेगवे'चा आनंद लुटला.