Martin Guptill, NZ vs IRE : न्यूझीलंडच्या फलंदाजांनी ४९ चेंडूंत पाडला २१४ धावांचा पाऊस, मार्टिन गुप्तिलची शतकी खेळी; आयर्लंडसमोर उभं केला डोंगर

Martin Guptill, NZ vs IRE : भारत-इंग्लंड यांच्यातल्या वन डे मालिकेत धावा आटलेल्या पाहयला मिळत असल्या तरी न्यूझीलंडचे फलंदाज तुफान फॉर्मात दिसत आहेत. आयर्लंडविरुद्धच्या तिसऱ्या वन डे सामन्यात तर किवी फलंदाजांनी ४० चौकार व  ९ षटकारांची आतषबाजी करताना ४९ चेंडूंतच २१४ धावांचा पाऊस पाडला. मार्टिन गुप्तिलने ११५ धावांची खेळी करताना १५ चौकार व २ षटकार खेचले. हेन्री  निकोल्सनेही ७९ धावांची वादळी खेळी करताना आयर्लंडसमोर ३६१ धावांचे तगडे लक्ष्य उभे केले. मार्टिन गुप्तिल व फिन अॅलन यांनी पहिल्या विकेटसाठी ७८ धावा जोडताना किवींना चांगली सुरुवात करून दिली. फिन अॅलन २८ चेंडूंत ७ चौकारांच्या मदतीने ३३ धावांवर माघारी परतला. विल यंग ( ३) लगेच माघारी परतला. पण, गुप्तिल व कर्णधार टॉम लॅथम यांनी गाडी रुळावर आणली. या दोघांनी ६० धावांची भागीदारी केली. लॅथम २६ चेंडूंत ३ चौकार व १ षटकारासह ३० धावांवर बाद झाला. त्यानंतर गुप्तिलची विकेट पडली. त्याने १२६ चेंडूंत १५ चौकार व २ षटकारांसह ११५ धावा चोपल्या.

यानंतर हेन्री निकोल्सने मोर्चा सांभाळला. त्याला ग्लेन फिलिप्स, मिचेल ब्रेसवेल व मिचेल सँटनर यांची साथ मिळाली. निकोल्सने ५४ चेंडूंत ७ चौकार व ३ षटकारांसह ७९ धावा केल्या. फिलिप्सने ३० चेंडूंत ५ चौकार व २ षटकारांसह ४७  धावा केल्या. ब्रेसवेलनेही १६ चेंडूंत १ चौकार व १ षटकारासह नाबाद २१ धावा, तर सँटनरने १० चेंडूंत २ चौकारांसह नाबाद १४ धावा केल्या. न्यूझीलंडने ५० षटकांत ६ बाद ३६० धावा चोपल्या.