नवी दिल्ली: टी-२० वर्ल्ड कप २०२६ च्या अंतिम सामन्यात भारताकडून झालेल्या पराभवानंतर न्यूझीलंड क्रिकेट बोर्डाने भविष्याच्या दृष्टीने एक अत्यंत धाडसी पाऊल उचलले आहे. दक्षिण आफ्रिकेविरुद्ध होणाऱ्या आगामी ५ सामन्यांच्या टी-२० मालिकेसाठी न्यूझीलंडने आपला १८ सदस्यीय संघ जाहीर केला असून, यामध्ये अनेक वरिष्ठ खेळाडूंना विश्रांती देत नव्या दमाच्या खेळाडूंना संधी देण्यात आली आहे.
या मालिकेसाठी न्यूझीलंडने 'हायब्रीड' कप्तानीची रणनीती आखली आहे. अनुभवी अष्टपैलू मिचेल सँटनर मालिकेतील पहिल्या तीन सामन्यांत संघाचे नेतृत्व करेल. त्यानंतर तो विश्रांती घेईल आणि शेवटच्या दोन सामन्यांसाठी टॉम लॅथमकडे कप्तानीची धुरा सोपवण्यात येईल. विशेष म्हणजे, लॅथमचे दीर्घकाळानंतर टी-२० संघात पुनरागमन झाले आहे.
तीन नव्या खेळाडूंचे पदार्पण
पुढील वर्ल्ड कप चक्रासाठी मजबूत 'बेंच स्ट्रेंथ' तयार करण्याच्या उद्देशाने न्यूझीलंडने देशांतर्गत क्रिकेटमध्ये चमकणाऱ्या तीन अनकॅप्ड खेळाडूंना संघात स्थान दिले आहे.
१. कातेने क्लार्क (फलंदाज)
२. निक केली (फलंदाज)
३. जेडन लेनॉक्स (स्पिनर)
दिग्गजांना विश्रांती
वर्ल्ड कपमधील थकवा आणि व्यस्त वेळापत्रक पाहता फिन ॲलन, मार्क चॅपमन, डॅरेल मिचेल, ग्लेन फिलिप्स, रचिन रवींद्र आणि टिम सीफर्ट यांसारख्या नियमित खेळाडूंना या मालिकेतून विश्रांती देण्यात आली आहे. तसेच, वेगवान गोलंदाज मॅट हेन्री देखील वैयक्तिक कारणास्तव उपलब्ध असणार नाही. मात्र, काइल जेमिसन आणि जिमी नीशम यांसारखे अनुभवी खेळाडू संघात ठेवण्यात आले आहेत.
