अष्टपैलू क्रिकेटपटूवर दोन वर्षांची बंदी; कोकेन सेवन केल्याचे ड्रग्ज टेस्टमध्ये झाले निष्पन्न

cricketer test positive in drugs test: अचानक झालेल्या रूटीन ड्रग्ज टेस्टमध्ये तो दोषी आढळला

cricketer test positive in drugs test: न्यूझीलंडचा माजी अष्टपैलू खेळाडू डग ब्रेसवेल (Doug Bracewell) पुन्हा एकदा मोठ्या वादात सापडला आहे. कोकेन या प्रतिबंधित अमली पदार्थाचे सेवन केल्याचे ड्रग्ज टेस्टमध्ये सिद्ध झाल्यामुळे त्याच्यावर दोन वर्षांची बंदी घालण्यात आली आहे. सप्टेंबर २०२५ मध्ये झालेल्या रूटीन ड्रग्ज टेस्टमध्ये तो दोषी आढळला होता, ज्याचा निकाल आता समोर आला आहे.

काउंटी क्रिकेट दरम्यान घेतले कोकेन

मिळालेल्या माहितीनुसार, इंग्लंडमधील एसेक्स (Essex) क्लबसाठी काउंटी चॅम्पियनशिप सामना खेळत असताना ब्रेसवेलने कोकेनचे सेवन केले होते. एसेक्स आणि समरसेट यांच्यातील सामन्याच्या पहिल्या दिवसाचा खेळ संपल्यानंतर आणि दुसऱ्या दिवसाचा खेळ सुरू होण्यापूर्वी त्याने हे कृत्य केले. धक्कादायक बाब म्हणजे, कोकेनचे सेवन करूनही तो सामन्याच्या दुसऱ्या दिवशी मैदानात उतरला होता. या सामन्यात त्याने गोलंदाजी करताना काही बळीही टिपले होते, मात्र त्याच्या या कृतीमुळे आता त्याच्या कारकिर्दीवर मोठा डाग लागला आहे.

निवृत्तीनंतर लागली बंदी

डग ब्रेसवेलने डिसेंबर २०२५ मध्ये आंतरराष्ट्रीय आणि देशांतर्गत क्रिकेटमधून निवृत्ती जाहीर केली होती. मात्र, त्याच्यावरील ही बंदी २४ नोव्हेंबर २०२५ पासून लागू मानली गेली असून ती २३ नोव्हेंबर २०२७ पर्यंत कायम राहणार आहे. जरी त्याने क्रिकेटमधून निवृत्ती घेतली असली, तरी या बंदीमुळे तो कोणत्याही अधिकृत क्रिकेट उपक्रमात किंवा प्रशिक्षकाच्या भूमिकेत सहभागी होऊ शकणार नाही.

वादांशी जुने नाते

डग ब्रेसवेलचा वादांशी असलेला संबंध जुना आहे. यापूर्वी २०१४ मध्येही न्यूझीलंडमधील एका स्थानिक टी-२० स्पर्धेदरम्यान तो कोकेन टेस्टमध्ये पॉझिटिव्ह आढळला होता, त्यावेळी त्याच्यावर एक महिन्याची बंदी घालण्यात आली होती. याशिवाय २०१७ मध्ये 'ड्रिंक अँड ड्राईव्ह' प्रकरणातही त्याचे नाव आले होते. एसेक्स क्लबने ब्रेसवेलवर घालण्यात आलेल्या बंदीचे समर्थन केले असून, खेळाडूंकडून व्यावसायिक वर्तणुकीची अपेक्षा असल्याचे स्पष्ट केले आहे. ब्रेसवेलने न्यूझीलंडसाठी २८ कसोटी, २१ एकदिवसीय आणि २० टी-२० सामने खेळले आहेत.