लॉर्ड्सः इंग्लंड आणि आयर्लंड यांच्यात आजपासून एकमेव कसोटी सामन्याला सुरुवात होणार आहे. लंडनमधील लॉर्ड्स क्रिकेट ग्राऊंडवर होणाऱ्या या लढतीत इंग्लंडचाच खेळाडू यजमानांच्या विरोधात मैदानावर उतरणार आहे. पाच वर्षांपूर्वी इंग्लंडकडून आंतरराष्ट्रीय कसोटी क्रिकेटमध्ये त्यानं पदार्पण केले होते आणि आज होणाऱ्या सामन्यात तो आयर्लंडचे प्रतिनिधित्व करणार आहे. त्यामुळे त्याच्या कामगिरीकडे सर्वांचे लक्ष लागले आहे. जाणून घ्या कोण आहे तो...
बॉयड रँकिन असे या खेळाडूचे नाव आहे. त्याने इंग्लंड आणि आयर्लंड या दोन्ही देशांकडून आंतरराष्ट्रीय क्रिकेट सामने खेळले आहेत. 6 फुट 7 इंच इतकी उंची असलेला रँकिन डावखुरा जलदगती गोलंदाज आहे. 5 जुलै 1984 मध्ये लंडन येथे त्याचा जन्म झाला होता. त्याने 2014 मध्ये इंग्लंडकडून ऑस्ट्रेलियाविरुद्ध कसोटीत पदार्पण केले होते. त्या एकमेव कसोटीत त्यानं 13 धावा देत एक विकेट घेतली होती.
35 वर्षीय रँकिनने आतापर्यंत दोन कसोटीत चार विकेट, 73 वन डे सामन्यांत 104 आणि 36 ट्वेंटी-20 क्रिकेटमध्ये 39 विकेट घेतल्या आहेत. रँकिन म्हणाला की,''हा माझ्यासमोर अजब परिस्थिती निर्माण झाली आहे. इंग्लंड संघातील खेळाडूंना मी ओळखतो. कारकिर्दीत असा दिवस पाहायला मिळेल, असे कधी वाटलेही नव्हते.''
लॉर्ड्सवर इतिहास रचण्यासाठी आयर्लंड सज्जक्रिकेट विश्वचषक जिंकल्यानंतर इंग्लंडचा संघ प्रथमच मैदानात उतरणार असून, इंग्लंड आणि आयर्लंड यांच्यातील एकमेव चारदिवसीय कसोटी सामन्याला आजपासून लॉर्ड्सवर सुरुवात होणार आहे. अॅशेस मालिकापूर्वी एकमात्र कसोटी सामना इंग्लंड आयर्लंडविरुद्ध खेळणार आहे. विशेष म्हणजे कसोटी पदार्पण केल्यानंतरचा आयर्लंडचा संघ पहिल्यांदाच लॉर्ड्सवर खेळणार आहे.
गेल्या वर्षी आयर्लंडने कसोटी क्रिकेटमध्ये पाकिस्तानविरुद्ध पदार्पण केले होते. परंतु या सामन्यात आयर्लंडला पराभवाचा सामना करावा लागला होता. मात्र आता विश्वचषक उंचावणाऱ्या इंग्लंडला लॉर्ड्सवरच पराभूत करून ऐतिहासिक विजय मिळवण्यासाठी आयर्लंडचे खेळाडू उत्सुक आहेत.