Rassie van der Dussen Retirement: भारतात सध्या IPL 2026 चा हंगाम सुरु आहे. या हंगामातील सलामीचे काही सामने झाले असून चांगली सुरुवात झाली आहे. याच उत्साहाच्या वातावरणादरम्यान, अचानक एका स्टार खेळाडूने क्रिकेटमधून निवृत्ती घेतली आहे. दक्षिण आफ्रिकेचा स्टार फलंदाज रासी व्हॅन डर डुसेनने आंतरराष्ट्रीय क्रिकेटमधून निवृत्ती जाहीर केली आहे. रॅसी व्हॅन डर डुसेन या वर्षीच्या आयपीएलमध्ये खेळत नसला तरी, या लीगशी त्याचा मोठा संबंध आहे. दक्षिण आफ्रिकन क्रिकेट बोर्डाने अलीकडेच आपल्या क्रिकेटपटूंची नवीन करार यादी जाहीर केली, ज्यामधून वगळण्यात आलेल्या खेळाडूंमध्ये रॅसी व्हॅन डर डुसेनचाही समावेश होता.
सोशल मीडियावर निवृत्तीची घोषणा
रॅसी व्हॅन डर डुसेनने सोशल मीडियावर आंतरराष्ट्रीय क्रिकेटमधून निवृत्तीची घोषणा केली. दक्षिण आफ्रिकेसाठी खेळण्याचा त्याला अभिमान वाटतो, असे त्याने व्यक्त केले. आपल्या क्रिकेट प्रवासात योगदान देणाऱ्या प्रत्येकाप्रती त्याने कृतज्ञता आणि कौतुक व्यक्त केले.
दक्षिण आफ्रिकेने करारातून कोणाला वगळले?
करारातून मुक्त झालेला रॅसी व्हॅन डर डुसेन हा एकमेव दक्षिण आफ्रिकी खेळाडू नाही. डेव्हिड मिलर, नँड्रे बर्गर, जेराल्ड कोएत्झी आणि लिझाद विल्यम्स यांनाही मुक्त करण्यात आले आहे. तथापि, केवळ रॅसी व्हॅन डर डुसेननेच निवृत्त होण्याचा निर्णय घेतला आहे. मुक्त करण्यात आलेले इतर बहुतेक दक्षिण आफ्रिकी खेळाडू सध्या २०२६ च्या आयपीएलमध्ये खेळत आहेत.
रॅसी व्हॅन डर डुसेनची आंतरराष्ट्रीय कारकीर्द
रॅसी व्हॅन डर डुसेनच्या आंतरराष्ट्रीय कारकिर्दीत १८ कसोटी, ७१ एकदिवसीय आणि ५७ टी-२० सामन्यांचा समावेश आहे. त्याने तिन्ही फॉरमॅटमध्ये मिळून सहा शतकांसह जवळपास ५,००० धावा केल्या आहेत. त्याची सर्व सहा शतके एकदिवसीय सामन्यांमध्येच आहेत. रॅसी व्हॅन डर डुसेन गेल्या वर्षी ऑगस्टमध्ये शेवटचा आंतरराष्ट्रीय सामना खेळला होता.
रॅसी व्हॅन डर डुसेन शेवटचा २०२२ मध्ये आयपीएलमध्ये खेळताना दिसला होता. त्यावेळी त्याने राजस्थान रॉयल्सकडून खेळताना तीन सामन्यांमध्ये २२ धावा केल्या होत्या.
