आयपीएलमध्ये आज खेळल्या गेलेल्या सामन्यात पंजाब किंग्सनेचेन्नई सुपर किंग्सला ५ विकेट्स राखून पराभूत केले. कर्णधार श्रेयस अय्यरच्या झंझावाती अर्धशतकी खेळीच्या जोरावर पंजाबने चेन्नईचे २०९ धावांचे डोंगरासारखे आव्हान केवळ १८.४ षटकांत पार केले. या विजयासह पंजाबच्या संघाने या स्पर्धेतील सलग दुसरा विजय मिळव आहे. तर, चेन्नईच्या संघाला सलग दोन वेळा पराभवाचे तोंड पाहावे लागले.
नाणेफेक जिंकून पंजाबने प्रथम गोलंदाजी करण्याचा निर्णय घेतला. चेन्नईची सुरुवात अडखळत झाली. सलामीवीर संजू सॅमसन (७ धावा) आणि ऋतुराज गायकवाड (२८ धावा) स्वस्तात परतल्यामुळे संघ अडचणीत सापडला होता. मात्र, त्यानंतर युवा फलंदाज आयुष म्हात्रेने मैदानाचा ताबा घेतला. त्याने अवघ्या ४३ चेंडूंमध्ये ६ चौकार आणि ५ षटकारांच्या मदतीने ७३ धावांची स्फोटक खेळी करत पंजाबला बॅकफूटवर ढकलले. त्याला शिवम दुबेची मोलाची साथ मिळाली.
दुबेने २७ चेंडूंमध्ये नाबाद ४५ धावा कुटल्या. तर, अखेरच्या षटकांत सरफराज खानने केवळ १२ चेंडूंमध्ये ३२ धावांची आक्रमक फलंदाजी केली. या योगदानामुळे चेन्नईने २० षटकांत ५ बाद २०९ धावांचा डोंगर उभा केला. पंजाबकडून विजय कुमार वैशाखने सर्वाधिक दोन विकेट्स घेतल्या. तर, मार्को जान्सेन आणि युजवेंद्र चहलने प्रत्येकी एक-एक विकेट घेतली.
पंजाबचा दणदणीत विजय
दरम्यान, २१० धावांच्या मोठ्या आव्हानाचा पाठलाग करताना पंजाबला प्रियांश आर्य आणि प्रभसिमरन सिंग यांनी धडाकेबाज सुरुवात करून दिली. प्रियांशने केवळ ११ चेंडूंमध्ये ४ षटकार आणि ३ चौकारांसह ३९ धावा कुटून चेन्नईच्या गोलंदाजांवर दडपण आणले. प्रभसिमरन सिंगनेही ४३ धावांचे योगदान दिले, मात्र तो धावबाद झाला. मधल्या फळीत कर्णधार श्रेयस अय्यरने आघाडीवरून नेतृत्व करत २९ चेंडूंमध्ये ५० धावांची अर्धशतकी खेळी केली. यात त्याने ४ चौकार आणि ३ षटकार खेचले. पंजाबने हे लक्ष्य १८.४ षटकांत ५ विकेट्स गमावून विजय मिळवला.
