IPL 2025 RR vs LSG 36th Match Vaibhav Suryavanshi Makes Debut : जयपूरच्या मैदानात रंगणाऱ्या राजस्थान रॉयल विरुद्ध लखनौ सुपर जाएंट्स यांच्यातील सामन्यात नवा इतिहास रचला जाणार आहे. या सामन्यात रिषभ पंतने नाणेफेक जिंकून पहिल्यांदा फलंदाजी करण्याचा निर्णय घेतला. त्यानंतर संजू सॅमसनच्या अनुपस्थितीत संघाचे नेतृत्व करणाऱ्या रियान पराग याने इम्पॅक्ट प्लेयरच्या रुपात वैभव सूर्यवशी पदार्पण करणार असल्याचे स्पष्ट केले. १४ वर्षीय वैभव यशस्वी जैस्वालसोबत राजस्थानच्या डावाची सुरुवात करताना दिसू शकते. मैदानात उतरताच वैभव सूर्यंवशी नवा इतिहास रचेल. आयपीएलमध्ये खेळणारा तो सर्वात युवा खेळाडू ठरेल. १४ वर्षे २३ दिवस वय असताना तो पदार्पणासाठी सज्ज झालाय.
'लोकमत'चं WhatsApp चॅनल फॉलो करा!
मेगा लिलावात राजस्थानने या पोरावर खेळला होता मोठा डाव
वैभव सूर्यवंशी याचा जन्म २७ मार्च २०११ रोजी बिहारमधील ताजपूर या गावात झाला. वयाच्या चौथ्या वर्षांपासून क्रिकेट खेळणाऱ्या या पोरावर राजस्थान रॉयल्सच्या संघाने मेगा लिलावात मोठा डाव खेळला होता. १ कोटी १० रुपये मोजत राजस्थानच्या संघाने त्याला आपल्या ताफ्यात सामील करून घेतले. मेगा लिलावात मूर्ती लहान पण किर्ती महान या म्हणीनुसार त्याने इतिहास रचल्यावर त्याला यंदाच्या हंगामात पदार्पणाची संधी कधी मिळणार? हा प्रश्न आयपीएल स्पर्धा सुरु झाल्यापासून चर्चेत होता. अखेर त्याला इम्पॅक्ट खेळाडूच्या रुपात पदार्पणाची संधी मिळाली आहे.
अंडर १९ मॅचमध्ये ऑस्ट्रेलिया विरुद्ध शतकी खेळीनंही वेधलं होतं लक्ष
वैभव सूर्यंवशी याने जानेवारी २०२४ मध्ये बिहारकडून प्रथम श्रेणी क्रिकेटमध्ये पदार्पण केले होते. १२ वर्षे आणि २८४ दिवस वयात देशांतर्गत क्रिकेटमध्ये पदार्पणासही त्याने खास विक्रम आपल्या नावे केला होता. एवढेच नाही तर १९ वर्षांखालील भारतीय संघातून तो ऑस्ट्रेलिया विरुद्धही खेळला आहे. ऑस्ट्रेलिया विरुद्ध त्याने ५८ चेंडूत शतकही झळकावले होते.