IPL 2024, CSK vs RR Live Marathi : महेंद्रसिंग धोनी... आपला माही, कॅप्टन कूल चेन्नईच्या चेपॉकवर कदाचीत आज शेवटचा सामना खेळणार आहे. कोरोना काळात जेव्हा धोनीला शेवटची आयपीएल स्पर्धा आहे का असे विचारले होते, तेव्हा त्याने चेपॉकवर मला शेवटचा सामना खेळायला आवडेल, अशी इच्छा व्यक्त केली होती. ती घडी आज आली आहे... आयपीएल २०२४ मध्ये १२ सामन्यांत चेन्नई सुपर किंग्सने ६ विजय मिळवले आहेत आणि प्ले ऑफच्या शर्यतीत राहण्यासाठी त्यांना उर्वरित दोन्ही सामने जिंकणे महत्त्वाचे आहे. त्यामुळे राजस्थान रॉयल्सविरुद्धचा चेपॉकवरील हा सामना अत्यंत महत्त्वाचा आहे. CSK चे आव्हान प्ले ऑफपूर्वीच संपले, तर MS Dhoni चा आजचा सामना हा घरच्या मैदानावरील शेवटचा सामना ठरू शकतो.
एमए चिदंबरम स्टेडियम हे पाहुण्या संघासाठी नेहमीच आव्हानात्मक राहिले आहेत. इथे पाहुण्यांची विजयाची सरासरी ही केवळ २७.३ टक्केच आहे. इथे चेन्नई सुपर किंग्सने निर्विवाद वर्चस्व गाजवले आहे आणि त्यामुळे आजच्या सामन्यातही यजमान बाजी मारतील अशी अपेक्षा आहे. मात्र, आयपीएल २०२४ मध्ये CSK ला मागील पाच सामन्यांत ३ वेळा हार मानावी लागली आहे आणि त्यामुळे त्यांचा प्ले ऑफचा मार्ग खडतर झाला आहे. MS Dhoni ने आयपीएलमध्ये २६२ सामन्यांत ५२१८ धावा केल्या आहेत. त्यात ३६० चौकार व २५१ षटकार आहेत. यष्टींमागे धोनीने १५० झेल घेतले आहेत, तर ४२ स्टम्पिंग केले आहेत.
महेंद्रसिंग धोनीच्या नेतृत्वाखाली चेन्नईने २०१०, २०११, २०१८, २०२१ व २०२३ अशी पाच आयपीएल जेतेपदं पटकावली आहेत. धोनी हा आयपीएलमध्ये सर्वाधिक ५०००+ धावा करणारा एकमेव यष्टिरक्षक आहे, त्याने यष्टिंमागे सर्वाधिक १८४ बळी टीपले आहेत. त्याने आयपीएलमध्ये सर्वाधिक २५७ सामने खेळले आहेत आणि सर्वाधिक ११ फायनल्स खेळण्याचा पराक्रमही धोनीच्या नावावर आहे. कर्णधार म्हणून सर्वाधिक १३३ विजय हे त्याच्या नावावर आहेत.
