IPL 2022, Gujarat Titans vs Punjab Kings Live Updates : इंडियन प्रीमिअर लीगमध्ये नाणेफेक जिंकूनही प्रथम फलंदाजी करण्याचे धाडस हार्दिक पांड्याने ( Hardik Pandya) पुन्हा एकदा दाखवले. आजच्या पंजाब किंग्सविरुद्धच्या लढतीत गुजरात टायटन्सने ( GT vs PBKS) प्रथम फलंदाजी करण्याचा निर्णय घेतला. पण, हा निर्णय फसला, पांड्यासह गुजरातचे आघाडीचे चार फलंदाज अवघ्या ६७ धावांवर माघारी परतले. त्यामुळे स्टार फलंदाज राहुल तेवातियाला ( Rahul Tewatia) मैदानावर लवकर यावे लागले. साई सुदर्शन हा एकाबाजूने गुजरातसाठी खिंड लढवत होता, परंतु राहुल त्याच्यावर खवळलेला दिसला. भर मैदानावर त्याने सहकारी फलंदाला सुनावले.
वृद्धीमान सहाने दमदार फटके मारून चांगली सुरूवात केली. पण शुबमन गिलच्या नशिबी पुन्हा अपयश आले. तिसऱ्या षटकाच्या पहिल्याच चेंडूवर धाव घेण्याच्या प्रयत्नात तो ९ धावांवर रन आऊट झाला. रिषी धवनने भन्नाट थ्रो करताना गिलला माघारी जाण्यास भाग पाडले. ही धाव घेताना गोलंदाज संदीप शर्मा ( Sandeep Sharma) सोबत गिलची टक्कर झालेली पाहायला मिळाली आणि बाद होताच गिलने त्यावरून नाराजी व्यक्त केली. पण, यात संदीपची चूक नसल्याचे रिप्लेत समोर आले. वृद्धीमान चांगले फटके मारत होता. पण, कागिसो रबाडाने त्याला चौथ्या षटकात माघारी पाठवले. वृद्धीमानने ३ चौकार व १ षटकारासह २१ धावा केल्या.