भारत विरुद्ध बांगलादेश ही मालिका खऱ्या अर्थानं भारतीय क्रिकेट इतिहासात नोंदवली जाणारी ठरली आहे. भारत दौऱ्यावर येणारा बांगलादेशचा संघ तीन ट्वेंटी-20 आणि दोन कसोटी सामन्यांची मालिका खेळणार आहे. 3 नोव्हेंबरपासून ट्वेंटी-20 मालिकेला सुरुवात होणार असली तरी चाहत्यांना कोलकाता कसोटीची उत्सुकता आहे. भारतात प्रथम डे नाईट ( दिवस रात्र) कसोटी सामना खेळवला जाणार आहे आणि तोही ऐतिहासिक इडन गार्डनवर. पण, या सामन्यासाठी टीम इंडियाचा कर्णधार विराट कोहली यष्टिरक्षक वृद्धिमान साहाकडून धडे गिरवायला शिकणार आहे. टीम इंडियासाठी डे नाईट कसोटीचा हा पहिलाच अनुभव असणार आहे. त्यामुळे सामन्यात कोणतीही उणीव राहू नये यासाठी साहा कर्णधार कोहलीची शाळा घेणार आहे. ही शाळा साहाच का घेणार?
साहासह गोलंदाज मोहम्मद शमीकडे स्थानिक क्रिकेटमध्ये डे नाईट कसोटी खेळण्याचा अनुभव आहे. या दोघांनी बंगाल क्रिकेट असोसिएशनच्या सुपर लीग अंतिम सामन्यात मोहन बगान संघाचे प्रतिनिधित्व करताना भोवनीपूर क्लबविरुद्ध खेळ केला होता. साहा म्हणाला,''त्या सामन्याबद्दल मला फारसे आठवत नाही. शमीनं वेगवान गोलंदाजी केली होती आणि आम्ही जिंकलो होतो. पण, गुलाबी चेंडूवर खेळणं तितकं सोपं नक्की नाही.''