गुवाहाटी : भारतीय संघाचा कर्णधार विराट कोहलीने पुन्हा आपल्या फटकेबाजीने चाहत्यांना मंत्रमुग्ध केले. आशिया चषक स्पर्धेतील विश्रांतीनंतर वन डे संघात पुनरागमन करणाऱ्या विराटने वेस्ट इंडिजच्या गोलंदाजांचा चांगलाच समाचार घेतला. त्याने फटकेबाजी करताना वन डे क्रिकेटमधील 49 वे अर्धशतक पूर्ण केले.
विराटने 37 चेंडूंत 10 चौकार लगावताना वैयक्तिक पन्नास धावांचा पल्ला पार केला. या कामगिरीसह त्याने 2018 वर्षात क्रिकेटच्या तिन्ही प्रकारात मिळून 2000 धावा करण्याचा विक्रमही केला. यंदाच्या वर्षात अशी कामगिरी करणारा तो पहिलाच खेळाडू ठरला आहे. विराटने सलग दुसऱ्या वर्षी हा पराक्रम केला आहे. त्याने गतवर्षी 2818 धावा केल्या होत्या.