राजकोट, भारत विरुद्ध वेस्ट इंडिज : वेस्ट इंडिजविरुद्धच्या मालिकेतील पहिल्या कसोटीतील पहिलाच दिवस गाजवला तो भारताच्या पृथ्वी शॉ याने... स्थानिक क्रिकेटमध्ये धावांचा रतीब रचणाऱ्या मुंबईच्या या खेळाडूला इंग्लंड भ्रमंतीनंतर अखेरीस भारताच्या वरिष्ठ संघात स्थान मिळाले. त्याने या संधीचं सोनं करताना पदार्पणातच धडाकेबाज शतकी खेळी केली. पृथ्वीची फटकेबाजी पाहताना तो विंडीज गोलंदाजांना आणखी डोईजड होईल असे वाटत होते, परंतु विंडीजचा फिरकीपटू देवेंद्र बिशूने त्याला बाद केले.
पृथ्वीच्या 134 धावांच्या खेळीने मात्र माजी कर्णधार सौरव गांगुलीचा 22 वर्षांपूर्वीचा विक्रम मोडला. गांगुलीने 1996 साली इंग्लंडविरुद्ध कसोटी संघात पदार्पण केले होते. त्यात त्याने 131 धावा केल्या होत्या. पृथ्वीने हा विक्रम मोडला. पदार्पणाच्या सामन्यात सर्वाधिक वैयक्तिक खेळी करणाऱ्या भारतीय फलंदाजांमध्ये पृथ्वी चौथ्या स्थानावर आहे. या क्रमवारीत शिखर धवन ( 187), रोहित शर्मा ( 177) आणि गुंडप्पा विश्वनाथ ( 137) आघाडीवर आहेत.