IND vs ENG 2nd Test ( Marathi News ) : इंग्लंडविरुद्धच्या हैदराबाद कसोटी सामन्यात २८ धावांनी पराभव पत्करावा लागल्यानंतर टीम इंडियाने दुसऱ्या कसोटी सामन्यापूर्वी तयारी सुरू केली आहे. २ फेब्रुवारीपासून विशाखापट्टणम येथे होणाऱ्या कसोटी सामन्यापूर्वी टीम इंडियाच्या सर्व फलंदाजांनी 'स्वीप' आणि 'रिव्हर्स स्वीप' शॉट्सचा जोरदार सराव केला. या फटक्यांमुळेच इंग्लिश फलंदाजांनी भारतीय फिरकीपटूंचा सामना केला. आता भारतीय फलंदाज इंग्लंडला त्यांच्याच भाषेत उत्तर देणार आहेत.
हैदराबादमध्ये मालिकेतील पहिल्या कसोटीत कर्णधार रोहित शर्माशिवाय अन्य कोणत्याही भारतीय फलंदाजाने स्वीप शॉटचा अवलंब केला नव्हता. त्याउलट इंग्लंडचे फलंदाज स्वीप फटक्याचा सुरेख वापर करताना दिसले. विशाखापट्टणम येथे दुसरी कसोटी होणार आहे आणि त्यासाठी बुधवारी दुपारच्या संघाच्या सुरुवातीच्या नेट सत्रात लय शोधत असलेला शुबमन गिल स्वीप आणि रिव्हर्स स्वीप या दोन्हीचा सराव करताना दिसला. गिल हा एक असा खेळाडू आहे ज्याच्याकडे जवळपास सर्वच शॉट्स आहेत पण मालिकेच्या सुरुवातीच्या सामन्यात त्याच्यावर जास्तच बचावात्मक भूमिका घेतल्याने टीका झाली.
शुक्रवारपासून होणाऱ्या दुसऱ्या कसोटी सामन्यात पदार्पण करण्याचा दावेदार रजत पाटीदारही स्वीप आणि रिव्हर्स स्वीपचा सराव करताना दिसला. संघाचे फलंदाज प्रत्येक चेंडूला स्वीप करत नव्हते पण ते हैदराबादच्या नेट सत्रापेक्षा खूपच जास्त होते. पहिल्यांदाच संघात सामील झालेला सर्फराज खानही फलंदाजीचा सराव करताना दिसला. तो आणि पाटीदार दोघेही स्लिपमध्ये झेल घेण्याचा सराव करत होते.
संघाचे फलंदाजी प्रशिक्षक विक्रम राठोड म्हणाले की, खेळाडूंनी त्यांच्या ताकदीनुसार खेळले पाहिजे. ते म्हणाले, "हे (स्वीप आणि रिव्हर्स स्वीप) तुम्ही प्रयत्न करू शकत नाही. तुम्हाला याचा सराव करणे आवश्यक आहे. तुमच्याकडे जास्त शॉट्स असतील तर ते फायदेशीर आहे. आम्ही पारंपारिक पद्धतीने खेळतो. आमची ताकद सरळ फलंदाजी आहे."
Web Title: IND vs ENG 2nd Test : Rohit Sharma's Team India engages in special practice session to counter England's sweep tactics in 2nd Test in Visakhapatnam
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
