मुंबई : आगामी वर्ल्ड कप स्पर्धेसाठीच्या भारतीय संघात स्थान पटकावण्यासाठी प्रत्येक खेळाडू इंडियन प्रीमिअर लीगच्या व्यासपीठाचा वापर करण्यासाठी सज्ज झाला आहे. राजस्थान रॉयल्स संघाचा कर्णधार अजिंक्य रहाणेही त्याला अपवाद नाही. विराट कोहलीच्या नेतृत्वाखाली खेळणाऱ्या भारतीय संघाची कामगिरी गेल्या वर्षभरात चांगलीच उंचावलेली आहे. त्यामुळे इंग्लंड व वेल्स येथे होणाऱ्या वर्ल्ड कप स्पर्धेत भारतीय संघच जेतेपदाचा प्रबळ दावेदार असेल असे मत अनेक जण व्यक्त करत आहेत. रहाणेनेही भारतीय संघ तिसऱ्यांदा वर्ल्ड कप उंचावेल, असे मत व्यक्त केले आहे. 30 मे पासून या स्पर्धेला सुरुवात होणार आहे.
वन डे क्रिकेटपासून रहाणे बराच काळ दूर असला तरी त्याने वर्ल्ड कप स्पर्धेत खेळण्याचा निर्धार व्यक्त केला आहे. भारतीय संघात चौथ्या क्रमांकाची कोंडी अजूनही कायम असल्याने रहाणेच्या नावाची चर्चा सुरू आहे. रहाणेही आयपीएलमध्ये दमदार कामगिरी करून वर्ल्ड कप संघात स्थान पटकावण्यासाठी सज्ज आहे.
भारताचा वर्ल्ड कप स्पर्धेत पहिला सामना 5 जूनला दक्षिण आफ्रिकेविरुद्ध होणार आहे.