IND vs PAK, Salman Agha Take Wicket Of Abhishek Sharma First Over : कोलंबो येथील आर. प्रेमदासा स्टेडियमवर रंगलेल्या भारत-पाकिस्तान यांच्यातील हाय-व्होल्टेज सामन्यात पाकिस्तान संघाचा कर्णधार सलमान अली आगानं सरप्राइजवर सरप्राइज दिल्याचे पाहायला मिळाले. नाणेफेक जिंकून पहिल्यांदा फलंदाजी करण्याऐवजी त्याने आधी गोलंदाजी करण्याला पसंती दिली. त्यानंतर टी-२० वर्ल्ड कप स्पर्धेत पहिल्यांदाच तो स्वत: पहिलं षटक घेऊन गोलंदाजीला आला. या षटकात त्याने अभिषेक शर्माच्या रुपात टीम इंडियाला पहिला धक्का दिला. टी-२० वर्ल्ड कप स्पर्धेतील आपल्या दुसऱ्या सामन्यातही अभिषेक शर्मावर खाते उघडण्याआधी तंबूत परतण्याची वेळ आली. त्याची विकेट पडल्यावर रोहित शर्माचा चेहरा पडल्याचे दिसून आले. सोशल मीडियावर रोहित शर्माची रिअॅक्शन व्हायरल होत आहे.
टीम इंडियाला पहिला धक्का बसला हा एक तुक्का?
सलमान अली आगा हा काही नियमित गोलंदाज नाही. त्यामुळे त्याने पहिले षटक टाकायला पुढे येणं हा एक प्रकारचा जुगारच होता. त्यामुळे त्याला जी विकेट मिळाली हा तुक्का आहे का? असा प्रश्न नक्कीच पडू शकतो. दुसरीकडे भारतीय संघाने पहिल्या षटकात पहिली विकेट गमावल्यावर रोहित शर्माचा चेहरा पडल्याचे पाहायला मिळाले. गत हंगामात टीम इंडियाला जेतपद मिळून देणारा रोहित शर्मा हा यंदाच्या हंगामातील टी-२० वर्ल्ड कप स्पर्धेचा ब्रँड अँम्बेसिडर आहे. भारत-पाक यांच्यातील सामन्यासाठी तो कोलंबो येथील प्रेमदासा स्टेडियमवर उपस्थिती आहे.
