IPL 2022 Sunrisers Hyderabad vs Gujarat Titans Live Updates : मोहम्मद शमी आणि केन विलियम्सन यांच्या लढाईत पुन्हा एकदा गुजरात टायटन्सच्या ( GT) गोलंदाजने बाजी मारली. आयपीएलमध्ये ५ वेळा शमीने विकेट घेत SRHला सुरुवातीला दोन धक्के दिले. पण, त्याच्या या कामगिरीवर गुजरातच्या अन्य गोलंदाजांनी पाणी फिरवले. अभिषेक शर्मा ( Abhishek Sharma) व एडन मार्कराम ( Aiden Markram) यांनी संधी साधली अन् हैदराबादला मोठे लक्ष्य उभे करून दिले. अभिषेक व एडन यांनी वैयक्तिक अर्धशतक झळकावताना ९१ धावांची महत्त्वपूर्ण भागीदारी केली. गरज पडल्यास गोलंदाजी करेन असे सांगणारा कर्णधार हार्दिक पांड्या ( Hardik Pandya) गोलंदाजांची धुलाई होत असताना बघ्याच्या भुमिकेत दिसला.
इंडियन प्रीमिअर लीगच्या १५व्या पर्वात प्ले ऑफच्या दिशेने मजबूत पाऊल टाकलेले दोन संघ आज वानखेडे स्टेडियमवर भिडणार आहेत. गुजरात टायटन्सने ( GT) सातपैकी सहा सामने जिंकले आहेत, तर सनरायझर्स हैदराबादने ( SRH) मागील पाचही सामने जिंकून जबरदस्त कमबॅक केले आहे. गुजरात टायटन्सने नाणेफेक जिंकून प्रथम गोलंदाजीचा निर्णय घेतला आहे. मोहम्मद शमीने पहिल्याच षटकात SRHच्या फलंदाजांना बाऊन्सर व भन्नाट वेगाने अचंबित केले. त्यामुळे हैदराबादने सावध सुरुवात करण्यावर भर दिला. पण, शमीने तिसऱ्या षटकात हैदराबादचा कर्णधार केन विलियम्सन ( ५) याचा त्रिफळा उडवला. यंदाच्या पर्वात खास काही करू न शकेलल्या राहुल त्रिपाठीला १ धावांवर राशिद खानने कॅच सोडून जीवदान दिले आणि त्यानंतर पुढील षटकार त्रिपाठीने शमीला झोडपले. ६,४,४ असे फटके मारणाऱ्या त्रिपाठीला सहाव्या चेंडूवर शमीने LBW करून माघारी पाठवले. त्रिपाठी १६ धावा करून बाद झाला. पण, अभिषेक व एडन मार्कराम यांनी गुजरात टायटन्सच्या गोलंदाजांचा घाम काढला. शमीच्या झटक्यानंतर गुजरातच्या अन्य गोलंदाजांकडून तशीच कामगिरी अपेक्षित होती. पण, अल्झारी जोसेफ, राशिद खान, ल्युकी फर्ग्युसन यांना अभिषेक व मार्कराम यांनी झोडले. अभिषेकने ३३ चेंडूत अर्धशतक पूर्ण केले आणि तेही खणखणीत षटकार खेचून.