आयसीसी पुरुष टी-२० विश्वचषक २०२६ च्या सुपर-८ फेरीतील अत्यंत महत्त्वाच्या सामन्यात भारताने झिम्बाब्वेचा ७२ धावांनी धुव्वा उडवला. गुरुवारी (२६ फेब्रुवारी) चेन्नईच्या मैदानावर रंगलेल्या या सामन्यात भारताने फलंदाजी आणि गोलंदाजीमध्ये वर्चस्व गाजवत उपांत्य फेरीच्या शर्यतीत स्वतःला कायम ठेवले. या सामन्यात हार्दिक पंड्या आपल्या जुन्या फॉर्मात परतलेला दिसला. भारताच्या डावातील शेवटच्या चेंडूत त्याने अर्धशतक झळकावले आणि त्यानंतर स्टँड्समध्ये बसलेली त्याची गर्लफ्रेन्ड माहिका शर्माला फ्लाइंग किस दिले, ज्याचा व्हिडीओ सोशल मीडियावर चांगलाच व्हायरल झाला आहे.
झिम्बाब्वेविरुद्धच्या सामन्यात भारताची धावसंख्या २५० पलिकडे नेण्यात हार्दिक पांड्याने महत्त्वाची भूमिका बजावली. हार्दिकने अवघ्या २३ चेंडूत नाबाद ५० धावा केल्या, ज्यात ४ चौकार आणि २ चौकारांचा समावेश आहे. हार्दिकची ही खेळी पाहून स्टँड्समध्ये बसलेली त्याची गर्लफ्रेन्ड माहिका शर्मा आनंदाने उड्या मारल्या. तसेच टाळ्या वाजवून त्याचे कौतुक केले. यावेळी हार्दिकनेही तिला फ्लाइंग किस दिले. या दोघांमधील हा रोमँटिक क्षण कॅमेऱ्यात कैद झाला असून त्याचा व्हिडिओ सोशल मीडियावर तुफान व्हायरल होत आहे.
या सामन्यात अभिषेक आणि संजू सॅमसनने पहिल्या विकेटसाठी ४८ धावा जोडून पाया रचला, तर मधल्या फळीत इशान किशन (३८ धावा) आणि सूर्यकुमार यादव (३३ धावा) यांनी धावगती कायम ठेवली. मात्र, शेवटच्या षटकांत हार्दिक आणि तिलक वर्मा यांनी केवळ ३१ चेंडूत ८४ धावांची अभेद्य भागीदारी करत झिम्बाब्वेच्या गोलंदाजांच्या नाकी नऊ आणले. भारताने हा सामना जिंकून सेमीफायनलच्या अपेक्षा जिवंत ठेवल्या.
हार्दिक पांड्याची टी-२० विश्वचषकातील कामगिरी
| तारीख | विरुद्ध संघ | धावा आणि विकेट |
| २६ फेब्रुवारी २०२६ | झिम्बाब्वे | ५० धावा आणि शून्य विकेट |
| २२ फेब्रुवारी २०२६ | द. आफ्रिका | १८ धावा आणि शून्य विकेट |
| १८ फेब्रुवारी २०२६ | नेदरलँड्स | ३० धावा आणि १ विकेट |
| १५ फेब्रुवारी २०२६ | पाकिस्तान | शून्य धाव आणि २ विकेट्स |
| १२ फेब्रुवारी २०२६ | नामिबिया | ५२ धावा आणि २ विकेट्स |
| ७ फेब्रुवारी २०२६ | अमेरिका | ५ धावा आणि शून्य विकेट |
