नवी दिल्ली : आयपीएल २०२६ साठी बीसीसीआयने सोमवारी नवीन मार्गदर्शक तत्त्वे आणि नियम जाहीर केले. यानुसार सामन्याच्या दिवशी कोणत्याही संघाला सराव करता येणार नाही. खेळाडूंची सामना सुरू होण्याआधी फिटनेस टेस्ट घेतली जाणार नाही.
जर्सी नंबर बदलायचा असल्यास किमान २४ तास आधी माहिती देणे बंधनकारक असेल आणि ड्रेसिंग रूममध्ये फक्त स्टाफलाच प्रवेश दिला जाईल. मुंबईच्या वानखेडे स्टेडियममध्ये दोन्ही संघांसाठी स्वतंत्र सराव व्यवस्था करण्यात आली आहे. प्रत्येक संघाला वेगवेगळे विकेट दिले जातील.
कोणताही संघ विरोधी संघाच्या विकेटचा वापर करू शकणार नाही. प्रत्येक संघाला सराव क्षेत्रात दोन नेट्स आणि मुख्य स्क्वेअरवर एक साइड विकेट दिली जाईल.
मुंबईत जर दोन्ही संघ एकाच वेळी सराव करीत असतील, तर त्यांना प्रत्येकी दोन विकेट दिल्या जातील. ओपन नेट्सना परवानगी नसेल. एखादा संघ आपला सराव लवकर पूर्ण करीत असेल, तरी दुसऱ्या संघाला त्यांच्या विकेटचा वापर करता येणार नाही. महत्त्वाचे म्हणजे सामन्याच्या दिवशी कोणत्याही प्रकारचा सराव पूर्णपणे बंद असेल.
फिटनेस टेस्ट होणार नाही
सामन्याच्या दिवशी मुख्य स्क्वेअरवर कोणत्याही प्रकारची फिटनेस टेस्ट होणार नाही. खेळाडूंना सरावासाठी टीम बसनेच यावे लागेल, मात्र आवश्यक असल्यास त्यांना दोन गटांमध्ये आणले जाऊ शकते. कुटुंबीय आणि मित्र वेगळ्या वाहनाने येतील.
फक्त हॉस्पिटॅलिटी क्षेत्रातूनच सराव पाहू शकतील. ड्रेसिंग रूम व मैदानावर फक्त अधिकृत स्टाफलाच प्रवेश असेल. अधिकृत स्टाफसाठी ॲक्रेडिटेशन कार्ड आवश्यक असेल. खेळाडूंच्या जर्सी नंबरमध्ये बदल करण्याआधी किमान २४ तास आधी माहिती द्यावी लागेल.
