हैदराबाद, आशिया चषक 2018 : भारत विरुद्ध पाकिस्तान यांच्यातील सामना अवघ्या काही तासात सुरू होणार आहे. दोन्ही देशांचे चाहते क्रिकेट युद्धासाठी सज्ज झाले आहेत. सोशल मीडियावर तर हे युद्ध जरा जोरातच पेटले आहे. भारत आणि पाकिस्तान यांच्यातील क्रिकेटमधील कोणत्याही सामन्याचा प्रत्यक्ष व अप्रत्यक्ष मनस्ताप टेनिसपटू सानिया मिर्झाला सहन करावा लागतो. त्यामुळेच आजच्या लढतीचा निकाल कोणाच्याही बाजूने लागला, तरी सानियाला त्यात रस नाही. म्हणूनच तिने सामन्याच्या 24 तासापूर्वी एक महत्त्वाचा निर्णय घेतला आहे.
''भारत विरुद्ध पाकिस्तान सामन्याला 24 तासांपेक्षा कमी कालावधी शिल्लक आहे. त्यामुळे काही दिवसांसाठी सोशल मीडियापासून दूर राहिलेलेच बरे. जेणेकरून त्या निरर्थक चर्चांचा मनस्ताप होणार नाही. मी गर्भवती आहे आणि मला एकटीला राहूद्या. हा केवळ क्रिकेट सामना आहे, हे लक्षात ठेवा,'' असे सानियाने ट्विट केले आहे.