भारत विरुद्ध दक्षिण आफ्रिका : भारताचा आजचा विजय आता उद्यावर लांबला आहे. भारताने दक्षिण आफ्रिकेवर फॉलोऑन लादला आहे. दुसऱ्या डावात तिसऱ्या दिवसअखेर दक्षिण आफ्रिकेची 8 बाद 132 अशी अवस्था आहे. त्यामुळे भारताचा आजचा विजय उद्यावर ढकलला गेल्याचे चाहते म्हणत आहेत. भारत विजयासाठी फक्त दोन विकेट्स दूर आहे.
भारत विरुद्ध दक्षिण आफ्रिका यांच्यातील तिसऱ्या कसोटीतही पाहुण्यांनी शरणागती पत्करली. भारताच्या पहिल्या डावातील 9 बाद 497 ( डाव घोषित) धावांचा पाठलाग करताना आफ्रिकेचा डाव 162 धावांत गडगडला. उमेश यादव, मोहम्मद शमी, रवींद्र जडेजा, शाहबाज नदीम यांनी उत्तम गोलंदाजी केली. एकवेळी आफ्रिकेचा डाव 3 बाद 107 असा मजबूत स्थितीत दिसत होता, परंतु भारतीय गोलंदाजांनी त्यांना जबरदस्त धक्के दिले. भारताने पहिल्या डावात 335 धावांची आघाडी घेतली आहे. कर्णधार विराट कोहलीनं फॉलोऑन देऊन ऐतिहासिक कामगिरी केली.
सऱ्या दिवशी रोहित शर्मानं द्विशतक आणि अजिंक्य रहाणेनं शतक झळकावले. रोहितचे कसोटी क्रिकेटमधील हे पहिलेच द्विशतक ठरले, तर अजिंक्यचे 11वे शतक ठरले. या दोघांनी 267 धावांची विक्रमी भागीदारी करताना भारताला मजबूत स्थितित आणले. या दोघांच्या फटकेबाजीच्या जोरावर भारताने चारशे धावांचा पल्ला पार केला. 3 बाद 39 अशा अडचणीत सापडलेल्या टीम इंडियाला त्यानं उपकर्णधार अजिंक्य रहाणेसह मजबूत स्थितित आणले. त्यानंतर रवींद्र जडेजानं अर्धशतकी खेळी केली. भारतानं पहिला डाव 9 बाद 497 धावांवर घोषित केला. प्रत्युत्तरात आफ्रिकेचे दोन फलंदाज अवघ्या 9 धावांत माघारी परतले होते.
तिसऱ्या दिवसाच्या पहिल्याच षटकात उमेश यादवनं अप्रतीम चेंडू टाकून आफ्रिकेचा कर्णधार फॅफ ड्यू प्लेसिसचा त्रिफळा उडवला. त्यानंतर झुबायर हम्झा आणि टेंबा बवुमा यांनी चौथ्या विकेटसाठी 91 धावांची भागीदारी केली. ही जोडी भारताची डोकेदुखी वाढवेल असे वाटले होते. पण, रवींद्र जडेजानं अर्धशतक झळकावणाऱ्या हम्झाला बाद केले. हम्झानं 79 चेंडूंत 10 चौकार व 1 षटकार खेचून 62 धावा केल्या. पंधरा वर्षांच्या क्रिकेट कारकिर्दीनंतर प्रथमच टीम इंडियाकडून पदार्पण करणाऱ्या शाहबाज नदीमनं भारताला यश मिळवून दिले. त्यानं बवूमाला बाद करून आंतरराष्ट्रीय क्रिकेटमधील पहिली विकेट पटकावली. बवूमानं 72 चेंडूंत 5 चौकारांच्या मदतीनं 32 धावा केल्या होत्या. कसोटी संघात पदार्पण करणाऱ्या हेन्रीक क्लासेनला रवींद्र जडेजानं त्रिफळाचीत केले.
दक्षिण आफ्रिकेचा बारावा खेळाडू करणार आता फलंदाजी
संघातील बारावा खेळाडू हा राखीव असतो. पण आता हा दक्षिण आफ्रिकेचा बारावा खेळाडू फलंदाजीसाठी उतरणा आहे. आता हा बारावा खेळाडू दक्षिण आफ्रिकेचा डावाने होणारा पराभव टाळणार का, याची उत्सुकता चाहत्यांना असेल.
आयसीसीचे नियम आता बदलण्यात आले आहेत. जर एखादा खेळाडू दुखापतग्रस्त झाला तर त्याच्याजागी राखीव असलेला बारावा खेळाडू खेळू शकतो. त्यानुसार आता दक्षिण आफ्रिकेचा बारावा खेळाडू फलंदाजीसाठी सज्ज झाला आहे.
तिसऱ्या सामन्यातील दुसऱ्या डावात दक्षिण आफ्रिकेचा फलंदाज डीन एल्गर हा दुखापतग्रस्त झाला आहे. उमेश यादवचा एक उसळता चेंडू एल्गरला लागला आणि तो थेट जमिनीवर पडला. त्यानंतर एल्गरची वैद्यकीय चाचणी करण्यात आली. त्याची ही दुखापत गंभीर स्वरुपाची असून तो हा सामना खेळू शकणार नाही, असे वृत्त आहे. त्यामुळे आता जर एल्गर खेळू शकत नसेल तर त्याच्याजागी बाराव्या खेळाडूला फलंदाजीसाठी पाठवण्यात येणार आहे.
Web Title: India vs South Africa, 3rd Test: India's today's win on tomorrow; Just two wickets away
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
