सतोशी नाकामोतो हे नाव आज जगातील क्रिप्टोकरन्सीबाबत माहिती ठेवणारा प्रत्येक जण जाणतो. परंतू, हा नाकामोतो आहे कोण? कसा दिसतो? कुठे असतो? हे एक रहस्यच बनले आहे. आजच्या जगात एवढे लपून राहणे कोणालाही शक्य नाही, मग नाकामोतो कसा राहिला असा प्रश्न साऱ्यांना पडला आहे. या व्यक्तीनेच लोकप्रिय क्रिप्टोकरन्सी बिटकॉईनची निर्मिती केली होती, अस म्हटले जाते.
आता ज्यांच्या नुसत्या ट्विटवर बिटकॉईन उसळतो, पडतो त्या जगातील सर्वाधिक श्रीमंत व्यक्तीने एलन मस्क यांनी बिटकॉईनच्या जन्मदात्याचे नाव सांगितले आहे. निक सजाबो नावाच्या व्यक्तीने बिटकॉईनची निर्मिती केली आहे.
विशेष म्हणजे, सातोशी नाकामोटोच्या ओळखीबाबत जगभरात अनेक मोठे दावे करण्यात आले आहेत, परंतु अद्याप कोणाचीही पुष्टी झालेली नाही. आता एलॉन मस्कने सतोशी नाकामोटोबद्दल काय खुलासा केला हा चर्चेचा विषय आहे. मस्क म्हणाले की संगणक शास्त्रज्ञ आणि क्रिप्टोग्राफर निक सजाबो यांनी बिटकॉइनचा शोध लावला असावा. एका अहवालानुसार, मस्क यांनी असा दावा केला आहे की निक सजाबोचे सिद्धांत विशेषतः बिटकॉइन, 'स्मार्ट कॉर्टेक्स' आणि डिजिटल चलन 'बिट गोल्ड'च्या निर्मितीमध्ये आधार ठरले आहेत.
स्पेसएक्स आणि टेस्लाचे मालक मस्क यांनी म्हटले आहे की, निक सजाबो यांनी सतोशी नाकामोटो असल्याचे नाकारले आहे, परंतु बिटकॉइनच्या विकासामध्ये त्यांचा दावा इतर कोणाहीपेक्षा मजबूत दिसत आहे. बिटकॉइनचा निर्माता ओळखणे अधिक महत्त्वाचे नाही असे ते म्हणाले.
क्रिप्टोग्राफर आणि डेव्हलपर जसे की Hal Finney, Nick Szabo, David Chaum आणि Wei Dai हे एक दशकाहून अधिक काळ पैशांची इलेक्ट्रॉनिक आवृत्ती विकसित करण्याचा प्रयत्न करत होते. मात्र, ते सर्व विविध कारणांमुळे अपयशी ठरले.
बिटकॉइन नेटवर्क 2009 मध्ये सुरू झाले
9 जानेवारी 2009 रोजी, नाकामोटोने बिटकॉइन नेटवर्क सुरू केले. फिनी हा त्याबद्दल उत्सुक असलेल्या काही लोकांपैकी एक होता आणि सुरुवातीच्या आठवड्यात दोघांनी नेटवर्क चालवण्यासाठी दूरस्थपणे काम केले. पहिला बिटकॉइन व्यवहार नाकामोटो ते फिनी यांच्यामध्ये झाला. जवळजवळ दोन वर्षे, बिटकॉइन हळूहळू वाढू लागल्यावर, नाकामोटोने संदेश बोर्डवर लिहिले आणि ईमेलद्वारे विकसकांशी खाजगीरित्या संवाद साधला. डिसेंबर 2010 मध्ये, नाकामोटोने सार्वजनिकरित्या पोस्ट करणे थांबवले आणि 2011 मध्ये डेव्हलपरशी बोलणे देखील थांबवले. नाकामोटोने या प्रकल्पाची धुरा सॉफ्टवेअर डेव्हलपर गेविन अँड्रेसेन यांच्याकडे सोपवली. परंतू यापैकी एकालाही नाकामोतो कोण आहे हे माहिती नव्हते. कारण हे सारे इमेलवर होत होते.
नाकामोटो हे आज एक रहस्य आहे
सार्वजनिक संदेशांमध्ये आणि नंतर प्रसिद्ध झालेल्या वैयक्तिक संदेशांमध्येही, नाकामोटो यांनी कधीही वैयक्तिक कोणत्याही गोष्टीचा उल्लेख केला नाही. नाकामोटोने कधीही स्वतःबद्दल, हवामानाबद्दल किंवा स्थानिक घटना किंवा कार्यक्रमांबद्दल काहीही सांगितले नाही. जे काही संभाषण झाले ते फक्त बिटकॉइन आणि त्याच्या कोडबद्दल होते. नाकामोटोने संभाषणासाठी दोन ईमेल पत्ते आणि वेबसाइट वापरली. त्यांची नोंदणी करणाऱ्या व्यक्तीची ओळखही ब्लॉक करण्यात आली होती. याबद्दल सार्वजनिक माहिती उपलब्ध नाही.