Sonu Sood Property : बॉलिवूडचा 'मसिहा' म्हणून ओळखला जाणारा अभिनेता सोनू सूद सध्या त्याच्या एका मोठ्या व्यावसायिक व्यवहारामुळे चर्चेत आला आहे. मुंबईतील वांद्रे येथील सोनू सूदची एक मालमत्ता देशातील सर्वात मोठी खाजगी बँक असलेल्या एचडीएफसी बँकेने ९ वर्षांच्या करारावर भाड्याने घेतली आहे. या व्यवहाराची अधिकृत नोंदणी फेब्रुवारी २०२६ मध्ये पूर्ण झाली असून, बँक सोनू सूदला दरमहा लाखो रुपये भाडे देणार आहे.
दरमहा ११.७५ लाखांपासून सुरुवात
'स्क्वेअर यार्ड्स'च्या आकडेवारीनुसार, सोनू सूदने वांद्रे पूर्वेकडील 'ट्रेड सेंटर बीकेसी' मधील आपली जागा एचडीएफसी बँकेला भाडेकरारावर दिली आहे. पहिल्या तीन वर्षांसाठी दरमहा ११.७५ लाख रुपये भाडे असणार आहे. बँकेने यासाठी ७०.५० लाख रुपये डिपॉझिट म्हणून जमा केले आहेत. करारातील अटीनुसार, दर तीन वर्षांनी भाड्यामध्ये १५% वाढ केली जाणार आहे. म्हणजेच २०२९ मध्ये या भाड्यात मोठी वाढ होईल.
मालमत्तेचे स्वरूप आणि किंमत
सोनू सूदने ही व्यावसायिक जागा ऑक्टोबर २०१२ मध्ये सुमारे २४.२५ कोटी रुपयांना खरेदी केली होती. या जागेचा कारपेट एरिया २,७०० स्क्वेअर फूट आहे. या युनिटसोबत बँकेला तीन डेडिकेटेड कार पार्किंग स्पेसही देण्यात आल्या आहेत.
वांद्रेतील हाय-व्हॅल्यू मार्केट
मुंबईतील वांद्रे हा परिसर केवळ पॉश म्हणूनच नाही, तर 'हाय-नेट-वर्थ' लोकांसाठी पहिली पसंती मानला जातो. वेस्टर्न एक्सप्रेस हायवे, वांद्रे रेल्वे स्टेशन आणि आगामी मेट्रो लाईनमुळे हा भाग बीकेसी, लोअर परेल आणि विमानतळाशी उत्तम जोडलेला आहे. याच परिसरात शाहरुख खान, सलमान खान, रणबीर कपूर, जान्हवी कपूर यांसारख्या बड्या स्टार्सची निवासस्थाने किंवा मालमत्ता आहेत.
गुंतवणुकीवर 'स्मार्ट' परतावा
सोनू सूदने २०१२ मध्ये केलेली गुंतवणूक आता त्याला उत्तम 'पॅसिव्ह इन्कम' मिळवून देत आहे. मोठ्या बँकांना जागा भाड्याने देणे हा रिअल इस्टेटमधील सर्वात सुरक्षित आणि फायदेशीर व्यवहार मानला जातो, कारण यामुळे दीर्घकाळ खात्रीशीर उत्पन्न आणि मालमत्तेच्या मूल्यात वाढ दोन्ही मिळते.