Oil India Limited: भारताच्या ऊर्जा क्षेत्रासाठी एक मोठी बातमी समोर आली आहे. सार्वजनिक क्षेत्रातील प्रमुख कंपनी असलेल्या Oil India Limited ने आफ्रिकेतील लिबियामध्ये तेल आणि नैसर्गिक वायूचा नवा साठा शोधून काढला आहे. ऊर्जा गरजांसाठी मोठ्या प्रमाणावर आयातीवर अवलंबून असलेल्या भारतासाठी ही अत्यंत महत्त्वाची बाब मानली जात आहे.
मिळालेल्या माहितीनुसार, ही शोधमोहीम लिबियाच्या दक्षिण-पश्चिम भागातील घडमास बेसिन या भागात करण्यात आली. हायड्रोकार्बन साठ्यांसाठी प्रसिद्ध असलेल्या या परिसरातील ऑनशोअर एक्सप्लोरेशन ब्लॉक (क्षेत्र ९५/९६) मध्ये ऑइल इंडियाला हे यश मिळाले आहे. या प्रकल्पात Indian Oil Corporation (IOCL) सोबत भारतीय कन्सोर्टियम असून ऑइल इंडियाची २५ टक्के हिस्सेदारी आहे. सुमारे ६,६३० चौरस किलोमीटर क्षेत्रफळ असलेल्या या ब्लॉकचे संचालन SIPEX कंपनी करत आहे.
या प्रकल्पांतर्गत एकूण ८ विहिरींची योजना आखण्यात आली होती. यापूर्वी पाच विहिरींची ड्रिलिंग पूर्ण झाली असून, त्यापैकी चार विहिरींमध्ये २०१२ ते २०१४ दरम्यान तेल आणि वायू सापडला होता. त्यानंतर पुन्हा सुरू करण्यात आलेल्या मोहिमेत सहाव्या विहिरीत तेल आणि गॅसचा नवा साठा सापडला आहे. प्राथमिक चाचणीत यश मिळाल्यानंतर लिबियाची राष्ट्रीय तेल कंपनी National Oil Corporation (NOC) ने या शोधाला अधिकृत मान्यता दिली असून, या ब्लॉकमधील ही पाचवी मोठी शोधमोहीम असल्याचे जाहीर केले आहे.
दरम्यान, या सकारात्मक घडामोडीचा परिणाम शेअर बाजारातही दिसून आला. Oil India Limited चा शेअर बॉम्बे स्टॉक एक्सचेंजवर २.५० रुपयांनी वाढून ४७६ रुपयांवर बंद झाला. गेल्या पाच दिवसांत या शेअरमध्ये १.०५ टक्क्यांची वाढ नोंदवण्यात आली आहे. ऊर्जा तज्ज्ञांच्या मते, परदेशात अशा प्रकारच्या शोधमोहीम यशस्वी ठरणे भारतासाठी दीर्घकालीन फायद्याचे आहे. यामुळे कच्च्या तेलाच्या आयातीवरील अवलंबित्व कमी होण्यास मदत होईल आणि आंतरराष्ट्रीय बाजारातील किंमतींच्या चढउतारांचा परिणाम कमी होऊ शकतो.