Share Market Holiday: जर तुम्ही शेअर बाजारामध्ये ट्रेडिंग करत असाल, तर ही बातमी तुमच्या कामाची आहे. उद्या म्हणजेच शुक्रवार, १ मे रोजी महाराष्ट्र दिनानिमित्त देशातील प्रमुख शेअर बाजार NSE आणि BSE बंद राहतील. यामुळे या आठवड्यात बाजारामध्ये केवळ चार दिवसच व्यवहार होऊ शकले आहेत. २०२६ च्या कॅलेंडरनुसार यावर्षी एकूण १६ सरकारी सुट्ट्या निश्चित करण्यात आल्या होत्या, ज्यापैकी ७ सुट्ट्या आधीच संपल्या आहेत. उद्याच्या सुट्टीनंतर, या वर्षाच्या उर्वरित महिन्यांत आणखी ८ दिवस असे असतील जेव्हा बाजारामध्ये कामकाज होणार नाही.
दरवर्षी १ मे रोजी महाराष्ट्र दिन साजरा केला जातो. मुंबई शेअर बाजार (BSE) आणि नॅशनल स्टॉक एक्सचेंज (NSE) या दोन्हीचे मुख्यालय मुंबईत (महाराष्ट्र) असल्यानं, या दिवशी शेअर बाजारांना सुट्टी असते.
मे ते डिसेंबर दरम्यान कधी असतील सुट्ट्या?
उद्या १ मे च्या सुट्टीनंतर, पुढील सुट्टी २८ मे रोजी बकरी ईदसाठी असेल. त्यानंतर वर्षाच्या उत्तरार्धात अनेक सणांनिमित्त बाजार बंद राहतील. २६ जून रोजी मोहरम, १४ सप्टेंबर रोजी गणेश चतुर्थी, २ ऑक्टोबर रोजी गांधी जयंती आणि २० ऑक्टोबर रोजी दसऱ्याची सुट्टी असेल. तसेच १० नोव्हेंबर रोजी दिवाळी आणि २४ नोव्हेंबर रोजी गुरु नानक जयंतीनिमित्त ट्रेडिंग बंद राहील. वर्षाची शेवटची सुट्टी २५ डिसेंबर रोजी नाताळनिमित्त असेल.
कमोडिटी मार्केटची वेळ काय आहे?
शेअर बाजाराव्यतिरिक्त कमोडिटी मार्केटबद्दल बोलायचे झाले तर, उद्या १ मे रोजी MCX सकाळच्या सत्रात बंद राहील, परंतु संध्याकाळी ५:०० वाजता मार्केट उघडेल आणि रात्री ११:३० किंवा ११:५० वाजेपर्यंत व्यवहार होतील. दुसरीकडे, NCDEX उद्या पूर्ण दिवस बंद राहील. कमोडिटी ट्रेडर्सना आपलं नियोजन यानुसारच करावं लागेल.